Dijyuz lauxsae ndeiriu mizyinx, suyoz lauxsae yiemzsuk nyinhcaen, yijvwnz lauxsae swnhsienh, boux vunz gou boiqfug ndeu couhdwg yijvwnz lauxsae——Veiz lauxsae.

Veiz lauxsae mbouj sang mbouj daemq, byoem ndaemndet raezrangrang, doiq lwgda miz saenz lumj rox gangjvah, naengnoh hausek, yawj hwnjbae dwg boux vunz simsoh youh gyaeundei.

Veiz lauxsae hwnjdangz gig ndeidingq, sing seuqset raeuzred. Miz baez ndeu, Veiz lauxsae gangj daengz goq《Aen Seiqgyaiq Daejhaij》, dingq sing gyaeundei de doeg govwnz, gou lumjbaenz aen ndang ndaem roengz daejhaij, lauxsae doeg daengz gizlawz, gou couh youz daengz gizlawz. Ciepdwk,lauxsae gangj govwnz lo. Dingq lauxsae gangj govwnz, gij gingjsaek baihnaj gou couh engq maezvunz lo. Gou dingq ndaej haeujsim lili lo. Soh daengz roengzdangz, gou cij daj daejhaij “fouz”hwnjdaeuj. Yawj, Veiz lauxsae gangj goq hawj vunz sim maez dangqmaz, gou caen gingqboiq de.

Veiz lauxsae guhhong cungj dwg nyinhcaen dangqmaz. Miz baez ndeu, causij cih moq seiz, gou dawz cih“凯”mbiengj baihgvaz sij baenz“タ”, Veiz lauxsae daraeh fatyienh le, sikhaek aeu lwgda lwnh gou, gou lienzmuengz byaij daengz henz ndang de, de vix hawj gou yawj, gou rox lo, yaengyaeng gaijcingq gvaqdaeuj, ndaw sim gou caen boiqfug lwgda de, doeklaeng gou sij cozyez engqgya nyinhcaen lo.

Veiz lauxsae mboujdan guhhong nyinhcaen, lij gig gvansim swnghhoz dou. Miz duenh seizgan ndeu, ndaw ban miz haujlai doengzhag dwgliengz lo, Veiz lauxsae daj ranz swhgeij cawj raemxdangzhing daeuj faen hawj dou gwn, naeuz raemxhing ndaej yw dwgliengz, dou ndaw sim raeujrubrub, dwgliengz hix ndei lo.

Veiz lauxsae ndei lailai ha! Gou gingqboiq lauxsae yienghneix.

（bouxlauxsae son’gyauq：Couh Yuz/周 旭）