“Doenghbaez——miz saek cib- geij bi loba, seizhaenx mwngz lij caengz okseng ne!”

“Gvaiq mbouj ndaej gou mbouj rox.”

“Seizhaenx miz boux dahmbwk he, maj ndaej gig lengj, gyae’gyawj gak mbanj daegmbauq ranz miz di ngaenz, cungj dak mehmoiz bae ranz de guhmoiz. Ndawde miz boux daeg- mbauq he, ranz de mbouj miz ngaenz geijlai, cij miz boux daxmeh he——”

“Boh de ne?”

“Dai lo, dingqgangj deng caeggeq ndaw bya goenjcug gaj dai lo.”

“Dwg bang caeggeq youq gwnz Byayauz?”

“Lauheiq dwg.” Daxdaiq hix- naengz dawz ceijdwkfeiz gab youq gij fa hab’ien, gou doq bae coux gvaq doengzien cuengq youq gwnz daizcaet.

“Daiq, mwngz gangj roengzbae ha!”

“Dwg mwngz dajduenh gij vah gou ne.”

“Gou caiq hix mbouj oksing lo.”

“Boux daegmbauq lauheiq hix gyaez boux dahmbwk haenx, couh gag ndwet hwnjdaeuj lo—— W, maz heuhguh gag ndwet, mwngz rox lwi?”

Gou mbouj nyienh caiq dajduenh gij vah daiq gangj, cij ngaekgyaeuj dwddwd.

“De hix dak vunz bae ranz dahsau haenx cammoiz, hoeng bohmeh ranz dahsau haenx cungj siengj ra boux lwggwiz ranz miz cienz, ndigah yawj mbouj hwnj de. De couh dauqcawq lwnh hawj gyoengqvunz, danghnaeuz ciuh vunz neix aeu mbouj ndaej dahsau neix guh yah, couh yaek bae guh hozsiengh. Bohmeh dahsau neix dingq le gij vah neix, engq mbouj leixlangh de lo, doeklaeng couh haq dahlwg hawj boux mbauq ranz gig miz cienz he.”

“Ha!” Gou youh lumz lo, nyaenx mbouj ndaej youh haibak dajduenh gij vah daxdaiq. “Baenzneix, de bae guh hozsiengh lwi?”

“Danghnaeuz de caen bae guh hozsiengh cixbah.”

“Vihmaz?”

“Aenvih de —— W, haxbaenh gou gangj daengz gyawz lo?…… W, gou gangj daengz dahsau haenx doeklaeng haq hawj daegmbauq ranz bouxmiz, ngoenz doxaeu gig nauhyied! Youq bakdou hung baij heiqdaiz ciengq heiq ndaej sam hwnz sam ngoenz, daizlaeuj baiz daengz haw bae. De gig siengsim, hoeng mbouj wnggai gyaeuj baez ndat couh hwnj bya bae.”

“Dwg bae guh hozsiengh lwi?”

“Dingqnaeuz hwnj bya bae guh caeggeq lo.”

“O? Baenzlawz rox?”

“Aenvih song bi le, de sawqmwh youh dauqma lo.”

“De gag gangj okdaeuj?”

“Beij de gag naeuz lij caen.” Lwgda daxdaiq sawqmwh byaengq ndaej gig hung, fwf gikdoengh hwnj- daeuj:“Ngoenzde gyanghwnz, de couh yinx caeggeq haeuj mbanj daeuj, gaemh gvan dahsau haenx bae.”

“Bemx. Byawz hawj de aeu boux dahsau gyaeundei haenx guh yah.” Gou daegbied