Heuh doengzhag guh laux doengzhag, neix gangjmingz bang doengzhag neix caen dwg geq lo. Gyoengqde dwg guek raeuz fuk gauhgauj ma laeng daih daihngeih daihhagseng, 50 boux vunz gungh aen ban ndeu, seizneix dingzlai boux gaenq duiyouh, cij miz gou caeuq 5 boux doengzhag lij hwnjban, 5 boux dou dwg dangbi gauhcungh bizyez couh gauj ndaej daihhag, hix yaek daengz nienzgeij duiyouh lo. Bang vunz laux 60 bi baedauq neix, gyanghaet romhriz couh daeuj daengz aen diemqcazsingz Namzningz doxcomz gwn cazhaet, siengj mbouj daengz lij ndaej gangj.

Ndwenngoenz gvaqbae yudyud, aen naj gaenq bienq geq, cij miz gij singq bouxvunz nanz gaijbienq.

Bide, boux doengzhag ninz youq doiqnaj congz gou haenx, Youq moux aen cunghyangh giyez dang gvaq bangunghsiz cujyin. Miz baez ndeu, gou bae banggunghsiz de youz, raen boux doengzhag caeuq gou doxdoengz dwg vunz lajmbanj neix, guh saeh suenq ceiq ndei lo: De cingq sij saw ciem vwnzgen, raen de sij geij aen cih “soengq lingjdauj baevah” neix, lumj cih boux suhfazgyah raixcaix, gij cih baenzneix gyaeundei, bouxlawz yawjraen le cungj rox maij! Saeh iq de cungj guh ndaej baenzneix ndei, saeh hung couh engqgya mbouj yungh gangj lo.

Boux doengzhag neix youq mwh doeg daihhag couh lienh sij cih lo, geijcib bi daeuj mbouj dingz gvaq. Gwn cazhaet gaxgonq, de soengq hawj moix boux doengzhag gaiq beizdoeb ndeu, gwnz beix miz sei de sij haenx. De gangj vahriu naeuz:“Neix dwg gij doxgaiq youq mwh ngoenzndat dajcaemx le daenj vaqgeh gip yungh.” Dou cix ndawsim cungj rox: Neix dwg faenh cingzeiq doengzhag ndeu! Cih de mbouj beij cih suhfazgyah yaez, cij dwg de mbouj mizmingz, mboujnex hix dwg aen cih dij cien maenz.

Bide boux doengzhag ninz youq baihswix congz gou haenx, youq ndaw yangh、ndaw yienh guh daeuz gvaq, doeklaeng diuq daeuj gihciz danhveih guh boux daeuz iq ndeu, de ceiq maij gangj vahaeunaj, mingzmingz rox dwg laux doengzhag, de cix haep bak hai bak “xx cangj” “xx gyausou”, hawj vunz daej riu mbouj ndaej. Gizsaed, duiyouh le, dang maz guen guh maz hak cungj dwg saeh gaxgonq lo. Gou yungh coenz vah ndeu daeuj gangjriu naeuz: Mboujlwnh dou nyuenz dwg vunz maz, seizneix cungj bienqbaenz bouxlaux lo.

“Siujbanh gyausou caen dwg ban raeuz boux ceiq coz ceiq miz dungxcaiz ha!” Cungj yaek duiyouh lo, boux daeggo neix lij mbouj lumz dauq neix, daihgya dingq le cungj riuhaha hwnjdaeuj.

Daihgya roxnyinh ceiq gvaqyinx dwg dingq song boux doengzhag doxcengq lajneix haenx.

Boux doengzhag ndeu gaenq duiyouh 5 bi lo, de ciengzseiz bae ndaw Nanzhuz Gunghyenz byaij, seiz mbouj seiz caeuq geij bouxlaux duiyouh haenx gangj saeh hung guekgya. Gyoengqde ceiq gvansim gij saeh dwg gyaqcienz ranz, laihnaeuz guekgya dingh naeuz “ranz dwg aeu daeuj youq”, gyaq ranz gig vaiq couh doek roengzdaeuj lo.

Siengj mbouj daengz, vah neix baez gangj okdaeuj, sikhaek miz boux doengzhag gyausou ndeu fanjdoiq ndaej gig haenq.

Yenzlaiz, song boux de dwg doiq “ien’gya” ndeu, youq mwh doeg daihhag, song boux couh ciengzseiz vih gij saeh boux naeuz dwg caenleix haenx doxceng dwk naj nding rwz dit. Miz baez ndeu, song boux de doxceng gij vahdaez dwg: Daengz ngoenz ndaej saedyienh “4 aen yendaiva”, aeu mbouj aeu yungh gim daeuj guh aen boiswiqbak. Boux ndeu naeuz aeu gim daeuj guh sai ngaenz lai, boux ndeu naeuz neix dwg beijgangj ndwi, dwg siuhswz soujfaz. Daj mbouj doengz gakdoh daeuj gangj, song boux gangj ndaej cungj mbouj loek, hoeng gyoengqde cix itdingh aeu ceng ok sang daemq saw hingz.

40 bi gvaqbae, naj gaenq bienq nyaeuq, byoem gaenq bienq hau, song boux raennaj lij aeu doxceng doxdingj: Boux ndeu naeuz, song bi doxndaw, gyaq ranz yaek doekroengz, boux ndeu naeuz, gangj song bi seizgan gangj ndaej goenq lai, aiq dwg song bi lingz geij ndwen ne?

Nanzgvaiq naeuz bouxlaux lumj lwgnyez, caenhguenj gyoengqde dwg doxceng mbouj dwg doxndaq, hoeng danghnaeuz mbouj ra aen mbaeklae ndeu, song boux lwgnyez hung neix bouxlawz hix roengz mbouj ndaej daiz daeuj. Yienghneix miz vunz dizyi: Hawj song boux de aen gihvei doxceng goengbingz ndeu—— boux daeggo A hingz, daeggo B couh cingj vunzlai gwn cazhaet; daeggo B hingz, couh hawj daeggo A cingj hek.

Mboujguenj byawz saw byawz hingz, dou dwg bouxhenz cungj dwg boux ndaej hingz, song bi gvaqlaeng youh miz cazhaet gwn lo.

Gwn cazhaet yaek sat, boux doengzhag yenzlaiz youq bumwnz guh hong youqgaenj ndeu guh cungjgez naeuz: Ngoenzneix, gyoengq doengzhag youq ndaw heiqfaenh ndatfoedfoed neix gyauliuz gij yawjfap doiq guekgya ginghci caeuq lwgminz gaendaenj, yienh’ok gyoengqraeuz lij nomj caengz geq, doengzhag gamjcingz ciengxlwenx naekna mbouj bienq, neix dwg baez gwn cazhaet doxgiet cinbu ndeu.

Youq daihgya sim’angq vahriu neix, baez gwn cazhaet neix sat lo.