Vih fatyiengz caeuq swnjcienz gij vwnzva conzdungj maenhndei Cunghvaz minzcuz, doicaenh caezcaemh doxgiet cinbu, cietsaed daezsang gij suijbingz sonhag lauxsae song vah, daezsang gij naengzlig gak gaep ganbu dieg comz- youq minzcuz youq mwh guhhong caeuq vunzlai doxgangj, bi 2019 ndwen 12 ngoenz 21, Cungguek Minzcuz Yijvwnz Fanhyizgiz、Swcigih Minzcunghveij youq Dwzbauj Yen banh bi 2019 aen ban son Cuengh Gun song vah.

Ciuq cam rox, Cungguek Minzcuz Yijvwnz Fanhyiz Cungsim(Giz) gaenq lai baez youq Dwzbauj Yen haiguh aen ban son Cuengh Gun song vah, aen ban neix cujyau comz hwnjdangz、comz hag guhdaeuz, cingj mizgven lauxhangz daeuj hwnjdangz、son bouxhag daeuj caeuqfaenh haenx, gaijgez gij vwndiz ngeizvaeg, bang gak gaep ganbu daezsang gij suijbingz yungh Cuengh Gun song vah, daegbied dwg daezsang gij suijbingz sonhag caeuq gij naengzlig yungh Vahcuengh Vahgun lauxsae Cuengh Gun song vah cungh siujyoz.

Aen ban neix guh 4 ngoenz, cujyau son gij gohyoz lwnhgangj Siz Ginbingz mizgven seizdaih moq vah saw minzcuz caeuq minzcuz doxgiet、gij vunqsik sonhag minz Gun song vah guek raeuz caeuq gij cingzgvang seizneix Gvangjsih sonhag Cuengh Gun、son doeg Vahcuengh yaem biucinj、son doeg Vahbujdungh daengj neiyungz.

Funghranz Sawcuengh Vahcuengh Cungguek Minzcuz Yijvwnz Fanhyiz Cungsim(Giz), Swcigih Minzcunghveij mizgven vunz, lauxsae song vah daj Duh’anh、 Lungzsangh、 Majai caeuq Nazgyaz daengj aen yanghcin sawq- niemh sonhag Cuengh Gun song vah nem lauxsae Sawcuengh Vahcuengh aen minzcuz cunghyoz ndaw yienh, Dwzbauj Yen dungjcan bouhmonz daengj danhvei ganbu Bouxcuengh, gungh 40 lai vunz caeuqfaenh aen yizsi haiban.

(Cwngh Gyangz)