Daxmeh okbae aeu yw ndaej nanznanz gvaq.

Daxmeh gag boux vunz ndeu youq Haijnanzdauj gyae’gyae de, mbwqlinlin dahraix, dwg lwi?

Wgo! Gou rox, daxmeh mbwq- linlin, aenvih daxmeh ciengzseiz haeuj ndaw loq gou daeuj.

Haemhlwenz, daxmeh youh haeuj ndaw loq gou daeuj lo, caeuq gou guhdoih youq gyangbuenz baih- naj ranz langhliengz. Gou naengh youq gwnz gyaeujhoq daxmeh, youq laj ronghndwen dingq daxmeh lwnh gojgaeq Haijnanzdauj.

Daxmeh naeuz, Haijnanzdauj goj miz maknim lumj biengz raeuz, maknim Haijnanzdauj goj van lumj biengz raeuz.

Daxmeh naeuz, Haij- nanzdauj goj miz duzbeih- nding lumj biengz raeuz, fwed duzbeihnding Haij- nanzdauj goj ronghcingh lumj biengz raeuz.

Daxmeh naeuz, haemh- lwenz Haijnanzdauj goj miz ronghndwen luenz lumj biengz raeuz, ronghndwen Haijnanzdauj goj rongh lumj biengz raeuz, goj unqswnh lumj biengz raeuz.

Daxmeh naeuz, ngoenz- neix de lij deng youq Haij- nanzdauj aeu haujlai yw dem, yienghneix, daxmeh couh vueng’vueng vatyat deuz lo……

Daxmeh okbae ndaej nanznanz gvaq.

Daxmeh mbwqlinlin, gag boux vunz ndeu youq giz gyae’gyae.

Dauqdaeuj vei, meh ha, gwnz bya ranz raeuz, miz fwjhau gyaeundei lai.

Dauqdaeuj vei, meh ha, laj bya ranz raeuz, miz raemxlae sasa nei.

Meh ha, dauqdaeuj vei, meh liz ranz okbae nanz lailai lo, fwjhau gwnz bya goj bienq mong lo.

Meh ha, dauqdaeuj vei, meh liz ranz okbae nanz lailai lo, gadah laj bya guhfwen mbouj vuenheij lo.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）