Vah bouxlaux cungj gangj: “Bouxlaux muengh ndaem naz, lwgnyez muengh gvaq cieng.”Coenz vah neix gangj ndaej cungj mbouj loek saekdi, boux lwgnyez lawz mbouj maqmuengh gvaq cieng ne?

“Sing bauq yiengj le cawz bi gaeuq, rumzcin ci daeuj gwn laeuj van. Gak mbanj gak hoh angqvauvau, bouxboux cungj nyaengq nem fuk- doiq.”Gaenriengz sing bauq yiengj- baba, cieng coit daeuj daengz lo. Seizhaenx, dou lwgnyez ninz ndaej laeg, hwnq ndaej caeux, bae hawj bouxhung baiqnienz, aeu gitleih. Ngoenz coit haenx, dou ndaw bak gamz gijdiemz, ndaw daeh cang gij- hom, dangyienz, ceiq youqgaenj dwg miz di souhaeuj mbouj noix couhdwg cienz goengheij ne! Cienzgangj, ndaw daeh gwnz ndang coq miz hoengzbau, duzgvaiq duzfangz cungj ndoj roen byaij deuz, gyoengq bouxhung hawj hoengzbau hawj dou, cuknyienh dou bingzonj ndangcangq, co’ngeih daengz cibseiq, gyoengq vunz bae mbanj cunz caencik, dox cukhoh bimoq ndei, bimoq sim’angq. Gwnz loh giceh iq, gyaq doek gyaq, singriu gyoengq lwgnyez daj ndaw ci cienz okdaeuj, cienz bae gig gyae gig gyae……

Cungj naeuz“Dahsau gyaez buhlengj, daeglwg maij lwgbauq”, hoeng, gou dwg dahsau, gou cix gyaez bae ndaw diemq dajgai cawx lwgbauq gvet daeuj saj. Heij saj seiz, gou lau lai lo, gaem diuz lwgbauq okdaeuj, fwngz saenzdedded mbouj dingz, gvet hix mbouj gamj gvet, moix baez gvet seiz cungj mbouj yiengj. Gou cungj siengj dawz de vut gyae’gyanggyang bae lo. Hoeng ndaw sim siengj“neix dwg aeu cienz goengheij gou cawx daeuj ne, mbouj ndaej luenh sai bw. ”Siengj dwk, gou simcaem roengzdaeuj, roengzrengz baez gvet, a, dawz feiz lo! Gou sikhaek vut bae baihnaj, buet dauqlaeng gyae’gyae bae. Cij dingq- nyi “bung”sing ndeu, aen sim gou haujlai nanz cungj mbouj ndaej caem roengzdaeuj.

Cibngux gvaq ciet yenzseuh le, dingq bouxlaux gangj, ndwencieng cibngux mbouj ndaej raed byoem, hix mbouj ndaej swiq gyaeuj, vih gijmaz ne? Gou hwnj muengx bae cazyawj, yenzlaiz dwg yienghneix gangj——Ngeix gaeuq. Gawqyienz dwg bimoq, yienghyiengh cungj wnggai dwg gij moq, gij gaeuq gvaqbae lo! Raeuz aeu maqmuengh gij gyaeundei, ndigah mbouj hawj swiq gyaeuj couh mbouj swiq ba, dingq vah bouxlaux, raeuz byaij baenaj moq！

Gvaq cibngux le, cietheiq ndwencieng couh gvaq sat lo. Gyoengq bouxlaux youh heij bae guhhong lo, dou hix bae hwnjhag lo. Lauxlaux cozcoz cungj dwg gwn ndei youq ndei gvaq liux, youh nyaengq hwnjdaeuj lo.

(lauxsae son’gyauq：Cinz Cinh- donz/覃珍团)