“De gig rox yaeuh vunz.” Gou baez naengh youq gwnz rinbanj mbaeklae naj ding, ngiengxyawj daiq naeuz:“Haxbaenh dou youq ndaw dah youzraemx, de lox dou gangj miz duz ngwzboengz hung he.”

“De couh rox gaemh duzngwz.”

“Daxdaiq, Aulungzgveiz rox gaemh duzngwz, mbouj dwg vunzndei ha?”

“Vunzndei baenzlawz rox bae gaemh duzngwz.”

“Duzngwz rox haeb vunz, dwg duzhaih, de gaemh duzngwz, wnggai dwg vunzndei ba.”

“Lwgnyez mbouj roxsoq, lij euq- vang.”

Gou gig mbouj fug. Aulungzgveiz youq ndawsim gou, yienznaeuz gou mbouj daiq maij de, hoeng cungj roxnyinh de gig ndeimaez、gig ndeiriu, hix gig gyoh, boux dog youq aen ranznamh youh daemq youh ndaem laeng miuhsaenzvangz, byawz hix mbouj gamj byaij haeujbae yawj ndaw ranz de miz maz huq baij, seiqgeiq daengx bi cungj ndaej baengh gyoengq vunzmbanj hawj de guh di hong- ngoenz, cij miz saek donq haeux gwn, cawz le lwgnyez ciengzseiz riu angq daeuq de, ndaw mbanj gyoengq vunzhung mboujlwnh bouxsai meh- mbwk, lumjnaeuz mbouj byawz yawj ndaej hwnj de, ndigah hawj gou gig doengzcingz de, yienznaeuz de ciengzseiz loengh gou、haep gou.

“Danghnaeuz de dwg vunzndei, hix mbouj rox baenzneix baihsaiq lo.” Daxdaiq cit gaemz ien ndeu, gij sing de caeuq hoenz ien caemh daj ndaw bak byoq okdaeuj.

“Neix dwg aenvih cojcoeng de mbouj miz reihnaz gyacanj ce hawj de.” Gou youh euqvang lo:“Dangh- naeuz de miz 10 moux reihnaz, 20 moux suenmak, lauheiq caezgya hix mbouj rox yienghneix yawj mbouj hwnj de lo.”

“Hei! Ranz de bonjlaiz hix mbouj yaez, gyaeujdah miz geij moux naz, hix miz fungh ranz he.” Daiq gaem doengzien, nap ceijdwkfeiz, danqheiq naeuz.

(caengz sat)