Haethaenx cingqngamj gwn faengx seiz, bouxsai gou fat sibinz daeuj, gou cam de ndaej gwn faengx lwi? De naeuz:“Mbouj miz faengx lo, ngoenzlwenz gyanghaemh faen sam aen faengx haenx hawj vunz, gwn seuq caez, gyoengqde cungj naeuz ndeigwn.” Gou riu naeuz:“Gij faengx gou son suek miz dauhleix naeuz mbouj ndeigwn ha?”

Mboengqneix dauqcawq senq nyi naeuz mou raq mou raq, ranz gou gaenq miz baenz ndwen mbouj cawx nohmou gwn gvaq. Mbouj miz nohmou guh hamh, ciet ngux nyied co’ngux ciuqyiengh aeu suek faengx, mbouj suek faengx cix mbouj lumj ndaej gvaq ciet ngux nyied co’ngux ne. Ranznden bouxboux cungj naeuz, mbouj rox dwk maz hamh suek faengx, nohmou mbouj miz, mbouj rox baenz lawz suek, cijndei suek faengx van, couhdwg yiengh maz cungj mbouj dwk, gwn seiz gyuj di dangzhau gwn.

Gou mbouj maij gwn gij van, gig lau gwn gij van. Baj gou cam naeuz:“Baenzlawz suek, dwk maz? Couh dwk duhheu ndij.” Gou naeuz:“Miz duhdau lwi, miz duhdau couh dwk duhheu caeuq duhdau, yoengq roengzbae gyaux haeux suek couh ndaej. “Dwk gyu dwk youz lwi?” Daxbaj youh cam. “Dwk ha.” Gou naeuz, “couh lumj gaxgonq yienghneix, cij dwg noix le nohmou. Yienghneix suek gij faengx okdaeuj, youh ndeiyawj hix ndeigwn ne.”

Gou daj iq couh maij gwn faengx, dauqngeix lij iq seiz, cungj dwg gvaq cieng cij miz faengx gwn. Lumj ciet ngux nyied co’ngux ha, daxmeh gyawz ndaejhoengq suek faengx gvaq. Ndigah, ranz gou bi daengz byai cij ndaej gwn baez faengx ndeu ne. Yaek gvaq cieng seiz, ranzranz cungj suek miz haujlai faengx, aenvih ndaw ndwencieng aeu faengx bae mbanj ha, daengx ranz vunz hix aeu gwn dem, ranz vunz noix di hix suek saek 20 gaen haeuxnah faengx. Baezbaez gat faengx seizhaenx, dou geij beixnuengx cungj gaem dawh ndwn youq henz daiz ngonz bouxlaux gat faengx. Bouxlaux ngamq gat ndaej, geij doiq dawh couh coemj hwnjbae, cungj dwg bae hah faengx cungqgyang gonq, faengxgyaeuj mbouj miz vunz hah. Aenvih faengx- gyaeuj mbouj miz hamh roxnaeuz hamh gig noix, dou cungj rox, faengx cungqgyang itdingh miz noh ndaw, caemhcaiq duh hix lai. Dangyienz, dou bibi cungj yiemz daxmeh suek faengx dwk hamh noix lai, nohmou gaiq mbouj gaeuq hung, dwk duh hix noix. Dou bibi yiemz, cix bibi muengh ndaej gwn faengx, ngah gwn dangqmaz.

Caengz okrog bae guh hong, gou couh laihnaeuz faengx cungj dox- doengz, cungj dwg dwk duh、nohmou guh hamh daeuj suek. Doeklaeng okbae nanz lo, cij rox dieg mbouj doxdoengz, faengx hix miz gak cungj gak yiengh、gak cungj feihdauh. Ndaw cangj ciet ngux nyied co’ngux gvenq fat faengx, itbuen fat song aen faengx sam gak, aen ndeu dwg faengx miz noh, aen he dwg faengx cuengq miz gyaeqbit hamz. Aen faengx ndeu geij gaemz couh gwn caez, mbouj gyu mbouj youz. Mboujgvaq gou maij gwn haeuxnah, miz faengx gwn gou couh angq. Youq rog hix miz faengx gai, cungj dwg faengx sam gak iq, couhdwg haeuxnah ndwi, mwngz gag gyuj dangzhau gwn. Gou ceiq mbwq cungj gwnfap neix, ceiq lau gwn daengz dangzhau baenz naed baenz naed nyaijgyoepgyoep. Lij miz cungj ndeu vunz naeuz faengxnoh, couhdwg dwk lauzmou gyaux haeuxnah, ndawde cuengq saek gaiq nohmou. Baez meiq roengzbae, yawjraen gij saek faengx ndaemnatnat, rwixyawj yaek dai, yi! Lij miz cungj ndeu vunz hix naeuz dwg faengxnoh, mboujgvaq mbouj dwk lauzmou bae gyaux haeuxnah, cungj neix gou goj gwn ndaej roengz.

Gwnz haenx gangj gij faengx cungj dwg faengx laujlouh, aen iq, vei guh, yak gwn. Gou lij dwg maij faengx Gvangjsih raeuz. Gveibingz hix gvenq dwk duhheu nem nohmou suek, mboujgvaq duhheu mbouj dwg dwk baenz naed, dwg dawz bae duet byak gvaq, vunz naeuz dwk duh baenz naed nyapnyadnyad, mbouj ndeigwn. Caemhcaiq, dwk duh dwk lai bw, 6 gaen haeuxnah aiq dwk baenz yaek 3 gaen duhheu. Baez gat faengx seiz yawjraen hamh caeuq haeux cungj ca mbouj lai. Gou maij gwn cungj neix. Gveibingz lij maij suek cungj faengx dem, heuhguh faengx raemxdaeuh. Couhdwg dawz nyangj- fiengz daeuj coemh baenz daeuh le, dwk daeuh cuengq ndaw raemx bae cimq gvaq, caiq daih aeu gij raemxsaw seuq dawz daeuj cimq haeuxnah. Gij haeuxnah aeu raemx- daeuh cimq gvaq, haeuxnah bienq ndaej henjswdswd, ndeiyawj. Suek cungj faengx neix gig vaiq, yiengh ndeu mbouj dwk, suek aen iqetet dwg faengxlwg, ceiq hab lwgnyez cimz lo. Gwn seiz cij gyuj dangzhau baenz naed soengq gwn, vunz bouxlaux naeuz cungj faengx neix singq liengz, mbouj lau gwn le ndang ndat.

Gou youq rog ndaej gwn faengx ndeigwn gvaq, dangyienz dwg faengx Gvangjsih raeuz, dwg faengx Hozciz. Hix dwg dwk noh nem duh guh hamh, hoeng gij faengx feihdauh gig daeg- bied, miz cungj heiq rang daegbied ndeu, caemhcaiq ngaiz haeuxnah hix daegbied miz feihdauh, fanjcingq dwg gij faengx gou gwn gvaq ceiq baenz gwn, caen dwg gaemzgaemz cungj rangfwdfwd, yied nyaij yied raen ndeigwn. Baengzyoux naeuz, faengx gyoengqde feihdauh daegbied miz song aen yenzyinh: It dwg gyoengqde cuengq miz go doenghyiengh muz nyaeq gyaux haeuxnah, cungj doengh- yiengh neix miz feih rang; ngeih dwg gij faengx gyoengqde cungj dwk roengz raemx bae dumq daengz cug, gij faengx dou cix dwg cuengq gwnz aen’gyaq bae naengj daengz cug, aeu naengj baenz hwnz baenz ngoenz bae.

Seizneix ciet ngux nyied co’ngux gvaqbae lo, youq neix dwen faengx, gou youh hozgyaez siengj gwn faengx lo. Faengx seizlawz ceiq ndeigwn ne? Gou nyinhnaeuz gag mwngz miz faengx seiz gwn ceiq van. Caengz gvaq ciet, gag ranz mwngz ndaej gwn ceiq gonq, bouxwnq caengz miz faengx gwn, seizde faengx caen ndeigwn bw; lij miz gaenq gvaq ciet geij ngoenz, mwngz cij gwn faengx, danghnaeuz bouxwnq mbouj miz faengx gwn, seizneix gwn faengx, daegbied miz feihdauh! Sou saenq lwi? Mbouj saenq? Sawqsawq yawj, lumjnaeuz seizneix suek faengx, itdingh ndeigwn!

Faengx