Mboengqneix, heiq minzcuz 《Liuz Sanhcej》 banj ciengqgo youz Cungguek Gohgi Vujgiyen lienzhab Gveilinz Si Vwnzva Gvangjden Caeuq Lijyouzgiz caezcaemh dajcauh haenx bae Sizniz Gohgiyen yienj.

Gij cienzgangj Liuz Sanhcej riuzcienz gvangq, gij go Liuz Sanhcej ndaej daengz gyoengq bouxyawj ndaw guek rog guek haengjgyaez. Baez neix Cungguek Gohgi Vujgiyen bae Audaliya caeuqfaenh Cungguek Audaliya vwnzva youqgaenj doxgyau hanghmoeg——Ciet Cunghvaz Vwnzva Audaliya Gaiq Daih- sam, aeu heiq minzcuz 《Liuz Sanhcej》 banj ciengqgo bae yienj, baij bae 80 lai vunz yienjok. Lij Daveiz dang cijveih, Ciengj Ningz yienj Liuz Sanhcej， Vuj Banh yienj Ahniuzgoh.

Heiq minzcuz 《Liuz Sanhcej》 gaijbien daj banj bi 1959 Gvangjsih heiqcaijdiu 《Liuz Sanhcej》、banj bi 1960 benq gojgaeq ciengqgo 《Liuz Sanhcej》 caeuq banj bi 1960 Gvangjsih heiqgofoux 《Liuz Sanhcej》, lwnhgangj gij gojgaeq saenzgeiz “sienfwen” Bouxcuengh Liuz Sanhcej, danqhaenh gij dungxcaiz vunz guhhong, langhbaij gij go miz funggek minzcuz, hawj conzdungj minzcuz vwnzva miz gij saemjgyaeu caeuq gyaciz seizdaih. Aen doih cauhguh heiq minzcuz 《Liuz Sanhcej》 comz boux raizbuj Leiz Leiz、boux bienheiq Yi Mingz、boux daujyenj Cai Veihman daengj buek yisuzgyah maenhndei ndeu.

Bouh heiq neix youq bi 2018 ndwen 2 youq Gveilinz Dagiyen sawq yienj, doeklaeng youq aen biqmuqsik ciet heiqgo Guekgya Dagiyen yienjok, caemhcaiq caeuqfaenh “seiz yienjok guekgya yisuz yienh duenz 2018” yienjok, ndaej daengz gyoengq boux- yawj haenhndei.

(Couh Veij)