Raen gwnz mbwn miz ronghrib bin gvaq, daiq swnhbak youh ciengq hwnjdaeuj lo: Duz ronghrib, ronghmigmig, bin roengzdaeuj, gwn mbawho; mbawho manh, gwn duzsap; duzsap haeu, gwn ciengqyouz; ciengqyouz fonx, couh gwn gyu; raen gyu haemz, gwn gosaep; gosaep henj, gwn makseq; makseq nding, gwn doengzien, ndaw miz daeuh, gwn roegraeu; roegraeu dingjfaex hemq, roeggeuq laj faex diuq; lauxsae maij cuengqgyaj, hagseng gyaez guhcaemz!

Coenz ceiq doeklaeng, sojmiz lwgnyez cungj gyaez dingq gyaez ciengq. Gyoengq lwgnyez youq hagdangz sij cozyez baeg le, youh mbouj gamj cigsoh gangj, cijaeu baez ciengq “duz ronghrib, ronghmigmig——”, lauxsae couh nyaex mbouj ndaej yaek riu, rox gij eiqsei gyoengq hagseng, ndigah couh hawj gyoengqde bae guhcaemz, swhgeij hix ndaej yietnaiq.

Gou doq buekbak:“Gou, gou mbouj hwnj gwnz bya bae gaeb majgvaij ha!”

“Mwngz gvaqdaeuj.”

“Meh gou ngoenzneix caengz dauq lwi?”

“Meh mwngz daeuj lo, bae suenbyaek gvak nywj lo.” Daxdaiq cim coh gwnz ndang gou yaep ndeu, riu ndaej daengx naj nyaeuq caez:“Ngoenzneix youz le geij baez raemx?”

“Daiq——”Gou laeglemx suenq, ngoenz- neix gaenq roengz raemx 3 baez lo.

“Aiq deng meh mwngz ndaq.”

“Gou mbouj youzraemx gvaq.”

“Mwngz lienz daiq cungj yaeuh mbouj ndaej, lij euqvang?”

“Daiq,” gou hix gig gvai, rox euq mbouj miz yungh, sikhaek cam saeh wnq:“Aulungzgveiz dwg vunzndei roxnaeuz dwg vunzrwix?”

“Gaej caeuq de doxyouq.” Daxdaiq cit gaemz ien ndeu, gig nyinhcaen gangj.

(caengz sat)