Haetromh, gou naengh youq laj dingz henz dah, gij rumz daj gwnz dah ci daeuj, liengzsisi, hawj vunz simsoeng.

Yienznaeuz seizneix dwg seizhah, hoeng mwh gou ngiengxgyaeuj yawj aen yiuhrumz gyaeundei youq gwnz mbwn yied mbin yied sang, gou hix nyaenx mbouj ndaej siengj daengz souj sei gvendaengz haenh seizcin caeuq yiuhrumz haenx daeuj.

Gij sing riu dahlwg dwggyaez、angqyangz, daj gizgyae cienz daeuj, ndawsim gou hix lumj fwjmok haetromh gwnz mbwn riengz rumz menhmenh sanq bae, simhai hwnjdaeuj.

Dahniq cuengq yiuhrumz couhdwg dahlwg ndaej 5 bi gou, de gyaeundei dwggyaez, caeuq de caez youq cungj mbouj mbwq gvaq, gij saeh ndeiriu、mizyinx de youh menhmenh yienh hwnjdaeuj.

Dahlwg yienznaeuz lij iq, hoeng coengmingz lingzleih, hix lij miz di cabheiq dem. Mizseiz lij siengj manz, siengj damq beizheiq bohmeh caeuq bouxlaux, ciengz hawj vunz simnyap dahraix. Mizseiz hozndat lai, caen siengj ndaq de donq he cij habhoz.

Lumj daxboh de daj iq daengz hung, couh gig sim’in de, hoeng de mboujdaih rox caeuq dahlwg doxdaeuq gangjriu. De ciengz muengh dahlwg yienghyeingh cungj dingqgangj, saehsaeh cungj haeujsim, hoeng dahlwg mizseiz cungj daegdaengq guh vang bae, hawj de hozbongz dangqmaz.

Miz baez ndeu, daxboh de raen gou nyaengq, youh aeu ganj bae haihoih, couh coi de ganjvaiq bae swiqndang. De lumj duznon iq nei menhnyednyed, doq veh dozveh doq han naeuz:“O ——Caj gou veh aen doz neix sat gonq, mboujnex dah gyaeundei neix couh mbouj fwngz mbouj din lo, geijlai yakyawj ha!”

Gvaq yaep ndeu, daxboh de youh daezsingj de vaiqdi hwnjdin bae swiqndang, de youh iet linx naj riu han naeuz:“Daxboh ceiq gyaez gou lo, bang gou riuj haizda daeuj, ndei lwi?”

Daxboh de raen de vahhoengq lai, hozndat dangqmaz, hujdengdeng hat de:“Aeu gya diuz faexbien lwi? Mwngz caiq ngaiznyed, yaep ndeu gou couh fad mwngz! Gou mbouj caeuq mwngz baenz raemhraex! Saeh bonjfaenh, gag guh!”

“O, ndaej ha, mwngz geiq maenh, gangj vah aeu suenqsoq bw, baezlaeng mwngz hix mbouj ndaej heuh gou bang dub laeng bw!” Siengj mbouj daengz, dah neix sikhaek mbouj vueng mbouj muengz boiz bak daxboh de, hawj daxboh de bak ajloengloeng, mbouj miz vah gangj, cij hujdengdeng dwk bae ra faexbien.

Vih son dahlwg, gou couh sing unq heuh de:“Dah gvai, gaej hag manz!” “O, vanzlij dwg daxmeh ceiq gyaez gou!” De laihnaeuz gou yaek bang de gangj vah ndei, fwt buet gvaqdaeuj, got goekga gou guh’unj.

“Mwngz sikhaek boih gawq vah saw ‘bohmeh heuh……’ banlaux okdaeuj!” Gou dadaengx naeuz de, youh yaepyaep da, caegcaeg heuh de aeu lauxsaed di, mboujnex, yaep dem couh nauhyied lo.

De fwt singj gvaqdaeuj, cij rox loengh gvaq- mauh lo, couh gaenjgip buet bae gag ra haizdaz swiqndang. Daxboh de daej riu mbouj baenz.

Dahlwg neix yienznaeuz mizseiz manz di, hoeng dingzlai cungj dwg dingqgangj roxsoq.

Guh bohmeh, cungj muengh lwgnyez maj ndaej ndang cangq vaiqvued. Hoeng, geij bi lwgnyez, miz geijlai boux maj ndaej baenz swnh? Mizseiz raen lwgnyez ngoenznaengz saetnyatnyat, dwggyaez dangqmaz, liuh mbouj daengz, banhaemh sawqmwh fatbingh. Mwh raen gij yiengh hojsouh de, ndawsim gou hix lumj deng cien fanh duz moed haeb nei, sim’in dangqmaz, caen nyienh lawh de souh hoj.

Geiq ndaej miz baez he daxboh de mbouj youq ranz, daengz byonghhwnz, seiqlengq caemrwgrwg. Sawqmwh, gou deng geij sing ae ging ndaej ndiu gvaqdaeuj lo. Laxlawz dwg sing dahlwg. Gou sikhaek hwnqdaeuj cam de baenzlawz yiengh lo, gyawz mbouj cwxcaih. De naiqnueknuek han gou:“Daxmeh, hoz gou ndatfwdfwd, youh siengj rueg……” Vah de lij caengz gangj sat, de youh ae raq ndeu, doq “va” sing he, couh rueg lo, rueg ndaej seiqlengq cungj dwg oemjsoemq……

Caj gou bang de swiq seuq, aeu yw hawj de gwn, sousib gwnz congz…… Gaenq dingqnyi sing gaeqhaen daj lajmbanj gizgyae cienz daeuj lo, seizneix cij rox nyaengq naiq dahraix. Gou lumh najbyak de, vanzlij mbouj cuengqsim, youh aeu vwnhdugi bang de rau ndangraeuj, yawj ndat lainoix. Raen de naj heusaegsaeg gig hojsouh, gou sim’in lai, youh umj de ninz yaep he……

Yaep he, de naiqnueknuek lij got maenh gou, sing iq gangj:“Daxmeh, dwg gou mbouj gvai, ciengzciengz mbouj ndeindei gwn……gwn ngaiz, byonghhwnz lij fatbingh, hawj mwngz baenzneix sinhoj. Doiq……doiq mbouj hwnj lo……”

“Doiq mbouj hwnj” sam cih dahlwg gangj ngamq gangj ok bak, sim gou sikhaek foekfan hwnjdaeuj, lumj fag mid gvej sim gou nei, mbouj rox mbouj nyinh aen ndaeng mazmwnh, conghndaeng soemjsatsat, raemxda caiq hix nyaenx mbouj ndaej, ndiksugsug roengzdaeuj. Siengj daengz mwh gou hong nyaengq seiz, simnyap raixcaix, dauqma ranz raen de gwn imq couh caih de gag youq, mbouj caiq leixlangh de…… Caen dwg……

Gou doq uet raemxda doq nai naeuz:“Mbouj dwg ne, dah gvai, dwg daxmeh ganq mwngz mbouj ndei……” Mbouj rox vihmaz, gou caiq hix gangj mbouj ok saek coenz vah lo, cij rox got dahlwg ndaetndaet bae!

Couhdwg dahsau hawj vunz youh “haemz” youh gyaez neix, mizseiz lij rox gangj gij vah hawj vunz liuh mbouj daengz dem.

Miz baez ndeu, aenvih de yaek hwnjdaiz biujyienj. Dou gwn caeux gvaq le, raen cij miz aen cungdaeuz he ndwi lo, couh coi de daenj buh haiz, aeu vaiqdi daiq de bae youwzyenz hawj lauxsae cang ndei.

Mwh de gungj hwet daenj haiz seiz, de raen gij doxgaiq haxbaenh aeu okdaeuj guhcaemz luenh- lablab sanq youq gwnznamh. De couh ganjvaiq maeuq roengzdaeuj, dawz gij doxgaiq guhcaemz gip ndei, caezcupcup cuengq roengz aen hab hung bae. Gij yiengh de siujsim sisi, lumj lauheiq gip laeuh saek aen nei……

Gou lau ganj mbouj gib, doiq de hemq naeuz:“Suenq lo, yaep ndeu dauqma caiq sousib lo. Mboujnex, couh daengz gvaiz lo.”

“Daxmeh, mwngz mbouj dwg ciengz gangj guh saeh aeu miz gyaeuj miz rieng ha? Gij doxgaiq neix sanqnyanya, geijlai yakyawj ha! Mwngz caiq hawj gou sam faencung sousib ndei, baenz lwi?” de nyinhcaen gangj le, song da vanzlij coh gou yaepyaep, gig ndeigyaez!

Gou baez anj, gag ngeix: Gou lij iq seiz, daxmeh gou ciengz heuh gou yienghyiengh aeu guh ndaej caezcupcup. Siengj mbouj daengz, gou maj- hung le cij baenz aen sibgvenq ndei neix, de ngamq ndaej 5 bi lai couh hag rox, gag guh daengz lo.

Yawj aen ngaeuz daenj vunj valoekloek haenx, caen lumj duz mbungqmbaj haj saek gyaeundei ndeu nyaengqnyatnyat mbin bae mbin dauq. Gou nyaenx mbouj ndaej daj ndawsim boiqfug de.

“Daxmeh, daxmeh! Mwngz yawj, vaiqdi yawj ha, aen yiuhrumz raeuz yaek mbin hwnj fwjhau bae lo!” Dahlwg daj gizgyae coh gou hemq, gig vaiqvued!