Dinbya miz go faexreiz ndeu, youh sang youh hung, hoeng de baenz mak youh iq youh mbouj baenzgwn, lij yakyawj dem, doek daeuj gwnz namh cungj mbouj miz vunz gip. Go faexmakbug henz ranz de, mbouj sang geijlai goj mbouj hung geijlai, hoeng de baenz mak youh hung youh baenzgwn, lij ndeiyawj dem.

Vihmaz ne? Gou cam daxmeh, daxmeh naeuz: Ciuh dam ciuh goj yienghneix go!

Gaxgonq goj yienghneix ha? Gou mbouj rox nauq. Hoeng, gou naemj, faexmakbug dwg faexgaenx. Seizcin, faexmakbug couh nyaengqnyatnyat ok ndokva baenz cumh baenz cumh homfwtfwt. Faexreiz goj gik ok ndokva, gou majhung baenzneix, lij caengz raen gvaq faexreiz ok ndokva bw. Lij miz dem, mwngz yawj vei, nga faexreiz seizseiz cungj roemj roengz gwnz namh daeuj, yaek ninz roengzdaeuj dem ma? Faexreiz gikgakgak. Mboujne, vihmaz gofaex sang baenzneix hung baenzneix, baenz mak couh iq baenzneix, yakyawj baenzneix, mbouj baenzgwn baenzneix ne?

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）