Ngoenzneix mbwn bumz liengz ndei, banringz- gvaq dangz daihroek dwg hwnj goq dijyuz, Danz lauxsae son dou guh cungj youzheiq gig mizyinx ndeu, de couh dwg leuvaiz.

Lauxsae gangj, aen youzheiq neix iugouz song boux vunz doxbingz ndwn youq gwnz diuz sienqsoh ndeu, naj doiq naj, caezgya aeu fajdin gvaz mbiengj baihrog doxdingj, fwngz gvaz doxgaem, yienzhaeuh aeu gyag、nyoengx、loi、leu daengj fuengfap, bik din doiqfueng nod dieg, bouxlawz sien lizhai diuz sienq couh suenq bouxlawz saw.

Lauxsae gangj sat gij gveihcwz youzheiq, dou couh caj mbouj gib dwk doengh fwngz hwnjdaeuj.Gou ra aeu duz“vaizseng”ceiq rengz—Vangz Dalungz, yaek sien dawz “duzvaiz”gyaengj neix leu roengzbae.

Dou song boux baij ndei, Danz lauxsae gangj sing“heij”, gou couh roxnyinh ndaej daengz raq rengz hung ndeu soh at coh gou, gou mbouj gimq caeg gyangz:“Caen dwg duz vaiz moengx bw!” Gou sikhaek hai cienz rengz daeuj dingj de.

Yienghneix dingj yaep ndeu, gou cungj lij dwg baih fuengzre, lij gig gwnrengz. Gou ndaw sim siengj:Caiq baenzneix dingj roengzbae mbouj ndaej bw, gou aeu siengj banhfap dwkhingz de cij ndaej. Gou sijsaeq yawj de baenzlawz ok rengz, yienzlaiz, duz“vaizgyaengj” neix moix baez okrengz seiz henz gaeu bak cungj doenghyaebyaeb, lij cungj dwg iet soh gen fwngz, ndei lai lo, gou ndaw sim miz daej lo.

De youh yaek iet soh fwngz gvaz lo.“Seizgei daeuj lo!” Gou ndaw sim caeg angq, gwnz gaeu bak de doengh gvaq le, gou sawqmwh cuengqsoeng gen gvaz, gen gou bienq ndaej unqlieglieg lo, caih de baenzlawz bik cungj ndaej. Seizneix cingq dwg mwh de heij okrengz rag dauqlaeng, de fwt dwk couh dawz fwngz gvaz gou rag gvaqbae lo, gojnaengz de raen geizgvaiq:“Yi, gijmaz saeh? Doiqfueng gig vaiq couh dingj mbouj ndaej la?” De cingq geizgvaiq seiz, gou raen de okrengz gvaqbouh, daengx aen ndang ngeng bae laeng, gou yawj cinj seizgei, sikhaek fat rengz, “seiq cangz dingj cien gaen”, haeb faenz haeb heuj, sawj ok rengz gwn cij doenq dauqlaeng. Caiq yawjyawj Vangz Dalungz, de baenzlawz hix ndwn mbouj maenh lo, soemxsoemx saxsax doenq laeng geij yamq, couh coemx caeghaex naengh gwnz namh lo. De naj hawqmywg, siengj mbouj doeng swhgeij baenzlawz couh saw ne?

Baezneix, duz “vaizseng”caiqhix ndiengq mbouj ndaej hwnjdaeuj lo. Gou yawj gij naj doeksaet de, sim siengj:Bouxlawz heuh mwngz mbouj doengh ukgyaeuj ne?Aenvih aen youzheiq neix dan ok rengz haex mbouj mizyungh, lij aeu beij uklingz, beij singjgae.

（lauxsae son’gyauq：Cuh Veimingz/朱卫明）