Ndwen 12 ngoenz 2 banhaemh, Nanzningz Swhfan Dayoz gaiq daih’it singsang doeg Vahcuengh doxdax youq cangzgangh yaugih gawjhengz.

Baez doxdax neix faen miz Vahcuengh vahdeihfueng caeuq Vahcuengh byauhcunj song cuj, miz gag doeg, hix miz lai vunz caezdoeg. Bingzveij yienhciengz daj faensoq baizmingz. Doxdax yienhciengz gyoengq senjsouj cungj daenj buhvaq Bouxcuengh, doxlwnz hwnjdaiz doeg Sawcuengh, gyoengqde yungh Vahcuengh byauhcunj caeuq vahdeihfueng, doeg ndaej miz cingz youh miz yinx, hawj gyoengq boux bingzveij caeuq boux daeuj yawj cungj roxnyinh daengz gij yinxdaeuz Vahcuengh. Doxdax sat le, aen hezvei vwnzva Bouxcuengh aen hagdangz neix lij yienj diuq foux faexsaux hawj daihgya yawj dem.

Baez doxdax neix, ndaej hawj gyoengq hagseng engq rox Vahcuengh caeuq vwnzva swhgeij, hix doiq hag ndei Vahcuengh engq miz sim, doengzseiz doenggvaq doxdax yawj gyoengq doengzhag bingzseiz hag ndaej baenzlawz yiengh.

(Cwngz Danhyingj Cinz Meijgyah Sung Ciuhlinz Loz Yungj Fanz Yijsuij/成丹颖 覃美嘉 宋秋霖 罗永 樊雨水)