Bi 2019 dwg Cungguek moq laebbaenz 70 hopbi, hix dwg 《Aen Diuzlaeh Saw Vah Minzcuz Vunznoix Gvangjsih Bouxcuengh Swcigih》 fat- bouh hengzguh hopbi ndeu. Vih caenh’itbouh gvancez doeksaed gij cwngcwz saw vah minzcuz caeuq faplwd fapgvi dangj, senhconz、yienh- ok gij diegvih habfap Sawcuengh Vahcuengh caeuq yungh、hwngfat Sawcuengh Vahcuengh, daejyienh hawsingz minzcuz daegsaek caeuq Dunghmungz yenzsu, langhbaij Gvangjsih vwnzva lai yiengh huzndei hwngfat caeuq gij yienghsiengq moq doiq rog hailangh, Nanzningz Si Veihningz Douzswh Cizdonz Mizhanh Cwzyin Gunghswh youq mwh hwnj- guh dieg haedsim gai lizsij vwnzva “Nanzningz Geq·Sam Gai Song Hongh” gaenxmaenx yungh Saw- cuengh Vahcuengh.

“Sam Gai Song Hongh” dwg aen vwnzlij cunghab hanghmoeg Nanz- ningz aen nduj yungh gij vwnzva Nanzningz geq guhdaeuz, langhbaij gij fungcingz nyuenzmiz Nanzningz geq, comz vwnzva vwnzcang、swnghdai lijyouz、 youqndwi guh’angq youq itheij, dieg haedsim it geiz hanghmoeg gviveh yungh najdieg 64 moux.

Bineix daeuj, Aen Cungsim Fugsaeh Saw Vah Minzcuz Vunznoix Nanzningz Si gaenxmaenx boiqhab Nanzningz Si Veihningz Douzswh Cizdonz Mizhanh Cwzyin Gunghswh guh gij hong mizgven, vih “Sam Gai Song Hongh” gingjgih gunghawj aen hidungj geiqhauh dazyawj fanhoiz Sawcuengh 2187 aen sawloih, ndawde baudaengz an mingzcoh gai 13 dieg, vwnzbauj danhvei 3 dieg, dieggingj haedsim 3 dieg, gij neiyungz dazroen 24 diuz. Seizneix, “Sam Gai Song Hongh” gaenq laebdaeb cang yungh gak loh baiz geiqhauh miz Sawcuengh、Sawgun、Yinghvwnz sam cungj saw haenx, hawj gyoengq siminz caeuq bouxhek cigsoh roxyiuj gij vwnzva vahgangj Nanzningz，engq cienzmienh roxyiuj gij lizsij vwnzva Nanzningz, gyalai roxyiuj gak loh saw vah, doiq coicaenh gak minzcuz doxhag saw vah, coicaenh gak minzcuz dox baedauq doxgyau doxyungz、gungganq caeuq cauhlaeb gij eiqsik caezcaemh Cunghvaz Minzcuz miz cozyung gaenxmaenx.

(Veiz Yinjsenz)