Haijhung ha, haijhung Gungxbaekbouh ha.

Mwngz couhdwg ga dah’iq sawdikdik haenx, dwg lwi? Dwg ga dah’iq daj ndaw lueglaeg Byalaux Cibfanh lae gvaq laj ndoibya ranz gou haenx, dwg lwi?

Haijhung ha, haijhung Gungxbaekbouh ha.

Mwngz couhdwg ga dah’iq sawdikdik haenx, dwg lwi? Mwngz lae gvaq laj ndoibya ranz gou, couh menhmenh bienqbaenz ga dahhung, dwg lwi? Youh byaij gvaq haujlai roen, bienqbaenz haijhung baenzneix, dwg lwi?

Haijhung ha, haijhung Gungxbaekbouh ha.

Mwngz couhdwg ga dah’iq sawdikdik haenx, dwg lwi? Doenghgij ruz venj gangfung hau youq baihgyae ndaw haij mwngz, couhdwg doenghgij ruziq gyaepgya gou coq youq ndaw gungxdah laj ndoibya haenx, dwg lwi? Doenghgij ruziq gyaepgya haenx, seizneix, goj bienq hung baenzneix lwma?

Haijhung ha, haijhung Gungxbaekbouh ha.

Mwngz couhdwg ga dah’iq sawdikdik haenx, dwg lwi? Mwngz lij roxgeiq gou lwi? Gou couhdwg boux lwgnyez gyaez mwngz dahraix, ciengzseiz youq henz raiq laj ndoibya guhcaemz haenx. Lij roxgeiq lwi? Mwngz baez bienqbaenz haijhung couh lumz baengzyoux seiziq luma? Vihmaz ne? Vihmaz ne? Lwnh gou nyi vei——

Haijhung ha, haijhung Gungxbaekbouh ha.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）