Duenh sujgyaj miz ngoenz ndeu, gou ngamq ma daengz ranzdaxdaiq, sawqmwh dingqnyi sing “nga nga——”, dwg duzvaiz heuh! Cij raen song duz vaiz bizbwdbwd byaij daeuj coh gou, dwg goengda cingq yien song duz vaiz okbae ciengx.

Gou hix gouz goengda yaek riengz de bae ciengx vaiz, goengda doengzeiq lo. Faen duz vaizlwg ndeu hawj gou yien. Vaizlwg yienznaeuz iq, hoeng mizrengz dangqmaz. Goengda yien duz vaizhung byai youq baihnaj. Gou yien duz vaizlwg riengz baihlaeng. Byaij gvaq benq nazbyaek, duz vaizlwg yawjraen byaekheu le, couh lumj fatbag nei cung haeuj nazbyaek bae. Gaemz hung gaemz hung dwk gwn gij byaekheu, mbouj yaep ndeu couh gwn bae haujlai byaekheu. Neix lij ndaej ha! Bouxcawj byaekheu langh raen ne itdingh ndaq gou dai bae. Gou yungh rengz baez beng, hoeng baenzlawz beng hix beng mbouj dauq, duzvaiz lij rag gou baenaj dem. Goengda raen le gig ndatheiq, ndenq diuz faex bien hawj gou naeuz：“Duz vaiz mbouj dingq vah couh yungh faex bien fad de.” Gou ciep gvaq diuz faex bien mbouj guenj s amcaet ngeihcib’it couh fad de, duz vaiz heuh song sing couh cienq gyaeuj byaij deuz lo.

Dou laebdaeb byaij, gou raen duz nengznyaen ndeu haeb galaeng duzvaiz. Gou yaengx hwnj diuz faex bien, fad coq nengznyaen bae. Hoeng duzvaiz cix laihnaeuz gou daegdaengq fad de, de cienq ndang gvaqdaeuj, gou laihnaeuz de dwg gyo’mbaiq gou, siengj mbouj daengz de yungh doiq da hung de caengz gou, song da hung lumj song aen lingzdoengz, hujfwdfwd dwk caengz gou, Gou baez daih’t raen aen ciengzmienh neix, mbei yaek dek bae, sikhaek doiqlaeng sam cik gyae. Hw! Caen dwg simndei deng ngwz haeb dem.

Dou daeuj daengz gaiq diegnywj hung ndeu, gij nywj gizneix maj ndaej mwncupcup, cij raen duzvaiz bongh haeuj diegnywj bae gwn. Duzvaiz yiet gaiqlinx raez de dawz go’nywj baez gienj, riengjret dawz nywj soengq haeuj ndaw bak, duzvaiz itmienh gwn nywj itmienh bi diuz rieng de, raen de gwn ndaej gig hom gig diemz. Yawj dwk yawj dwk. Aen bak gou hix riengz ning hwnjdaeuj. Haha.

Duzvaiz gwn nywj imq le, aen dungx lumj aen gang hung nei, caekhaex luenz lili, lij ok gong haexvaiz okdaeuj. Duzvaiz meh dinghdingh soengz dwk, aenbak nyaijvauvau, lij yawh di myaizhau okdaeuj ne. Duz vaizlwg gig cabheiq, seiz mbouj seiz yungh doiq gaeu iq de bae nyex daxmeh de, duz vaizmeh hix mbouj ndatheiq, lij yiet ok gaiqlinx bae riz duzlwg de, caen gyaez duzlwg de.

Hab baema ranz lo, caiq gingvaq gaiq naz byaekheu seiz, duz vaizlwg lij yiet aen hoz raezrangrang bae siengj gwn byaekheu, gou couh fad diuz faex bien raez bien hwk de. Gou siengj, duzvaiz gojnaengz hix lumj vunz nei, gwn haeux mbwq lo, siengj gwn di mak ityiengh.

（lauxsae son’gyauq：Vangz Gveiyangh/黄桂香）