Ndwen 11 ngoenz 19 daengz ngoenz 20, Aen Ban Son’gyauq Yawjhag Cuengh Gun Song Sawvah Sonhag Bi 2019 Daengx Gih youq Vujmingz Gih banh, hozdung dwg Swcigih Gyauyuzdingh cujciz, 80 lai boux gyauyenzyenz Cuengh Gun song sawvah、lauxsae Cuengh Gun song sawvah daengx gih gak yienh (si、gih) camgya aen ban neix.

Ndwen 11 ngoenz 19, gyoengq vunz camgya hozdung faen baenz song cuj, faenbied bae Vujmingz Gih Gingloz Siujyoz、Senhhuz Cin Cungh- gyauz Siujyoz yawjhag yienhciengz hwnjdangz.

Youq gwnz aen hoih veibau doxgyau ndwen 11 ngoenz 20, Swcigih Gyauyuzdingh Minzcuz Gyauyuzcu cucangj Cinz Yengenh cungfaen haengjdingh aen hozdung neix guh ndaej baenz. De naeuz, youq coglaeng sonhag Cuengh Gun song sawvah, aeu roxyiuj gij yiyi youqgaenj haiguh Cuengh Gun song sawvah gyauyuz, gyagiengz guenjleix sonhag Cuengh Gun song sawvah, mboujduenh daez- sang gij suciz lauxsae song sawvah, roengzrengz guh ndei sonhag Cuengh Gun song sawvah, caenh’itbouh doi- doengh sonhag Cuengh Gun song sawvah haeujlaeg guh.

Ciuq cam rox, Vujmingz Gih itloh haenqrengz guh hong son’gyauq sawvah minzcuz, itloh dingjmaenh cwngcwz bangfuz gonq、lingjdauj haeujrwz gonq、ngaenzcienz haeuj- coengh gonq、lauxsae boiqhawj gonq、lauxsae gungganq gonq、doxgaiq sonhag aeuhawj gonq, hawj sonhag Cuengh Gun song sawvah ndaej hwngfat ndei. Daengz seizneix, diegsingz miz aen hagdangz Cuengh Gun song sawvah 13 aen, hagseng 11636 vunz, lauxsae 38 vunz. Doenggvaq lai cungj fuengsik lauxsae Sawcuengh Vahcuengh camgya gij dinfwngz hwnjdangz Sawcuengh Vahcuengh si gaep doxhwnj daengj doxdax ndaej ciengj 25 vunzbaez, hagseng aen hagdangz song sawvah camgya doeg biucinj Vahcuengh si gaep doxhwnj daengj doxdax ndaej ciengj 35 vunzbaez.

(Se Yijnaz Banh Veilenz)