Gou baengh mbaetheiq beij Ah Cang lij ndaej nanz, umj de youq lajraemx, de haenqrengz cukcak, buekmingh nyoengx gou, siengj fouz ok najraemx, hoeng gou couhdwg mbouj cuengq fwngz, geij baez de fouz ok najraemx le youh deng gou rag roengzbae. Ah Cang hix mbouj goq maz lo, de hix umj gou, mbouj hawj gou fouz ok najraemx diemheiq. Doeklaeng songdou cungj naetnaiq rengz caenh lo, cij soeng fwngz, caez bongh ok najraemx daeuj. Gou yaek diemheiq geij baez le caiq laebdaeb hawj de gwn di vei, liuh mbouj daengz seizneix haenzdah cienz daeuj geij sing hat:

“Lwgnyez manz! Lwgnyez manz! Lwgnyez manz!!! Sou mbouj siengj lix ha?!”

Yienznaeuz mbouj aeu yawj couh dingq ndaej ok dwg sing Aulungz- gveiz, hoeng gou vanzlij aeu fwngz uetuet raemx giz lwgda, ngiengxgyaeuj yawj coh haenzdah.

Aulungzgveiz goeg lumj goengq lozcoemhceij nei ndwn youq laj gofaexnganx, fwngz ndeu gaem fag- camx, fwngz ndeu dawz ngafaex, gwnz ngafaex venj miz duz bya hung he.

“Ai! Aulungzgveiz, mwngz youh camx ndaej duz bya hung lo!” Miz lwgsai he hemq.

“Aulungzgveiz! Haemhneix youh ndaej gwn laeuj lo!” Lingh boux lwgsai hix sing hung hemq naeuz.

Gou hix deng duz bya hung ndaw fwngz de dawzyinx lo, ndang mbouj dingqgangj dwk riengz Ah Cang youz gyawj haenzdah.

“Lwgnyez manz! Sou doengh mbouj doengh couh youq ndaw raemx doxceng, doeklaeng cungj miz saek boux song boux deng dairaemx!” Aulungzgveiz najndaem, song da caengz dou, gou caen miz di lau de.

“Dou guh’angq ndwi.” Ah Cang baenq gyaeuj dauq laeng doiq gou riu:“Deng mbouj deng?”

“W, deng, deng!” Gou hix dap naeuz.

Aulungzgveiz lohdin, cik din vaq he binj daengz gwnz gyaeujhoq, gou yawj ndaej raen gabyaij de miz aen biuj ndaem gaenq naeuh, lingh cik din vaq cij binj daengz gahengh, lwggaet buh byaengq caez, loh ok gij aek gyaemj, fagcamx ndaw fwngz bibuengq le geij baez, gou miz di yousim de yaek dawz dou dangguh duz bya hung aeu fagcamx camz roengzdaeuj.

“Ndaw raemx miz maz ndei guh- angq ha?” De baetmaed dwk haep dou:“Yaek he gou couh naeuz hawj vunzhung ranz sou nyi.”

“Gou mbouj lau!” Ah Cang fanjbuek naeuz:“Meh gou mbouj ndaq gou ne!”

(caengz sat)