Siujgozging daj denva hawj Dagozging, gyoengq vunzsug miz mbouj miz byawz dang lauxbanj. Geij ngoenz neix daegnuengx mbouj rox dwen geijlai mbat lo, lumjnaeuz de hai sinsiz gunghswh nei. De mbouj miz sim bae guenj cungj saeh neix, haepda haibak mboen geij coenz couh sat lo. Daegnuengx couh youq de gekleiz, miz saeh gvaqdaeuj gangj bienh ndaej lai, hoeng cungj yaek daj denva. Duenh- neix song beixnuengx miz maz saeh cungj daj denva doxyaeng. Daeg- nuengx mbouj ndaejhoengq caeuq de menhmenh gangj, de caemh mbouj nyienh dingq daegnuengx mboen baenz lai, seizneix miz saeh daj denva doiq song boux cungj habdangq.

Song beixnuengx dwg lwg- songseng, ngoenz gozgingcez okseng, bohmeh couh hawj song boux de ancoh heuhguh “gozging”. Daegbeix gaen daxboh singq heuhguh Veiz Gozging, daegnuengx gaen daxmeh singq heuhguh Cinz Gozging. Vunz ndaw mbanj cungj heuh song boux de guh Dagozging caeuq Siujgozging. 40 bi gaxgonq, song beixnuengx itheij gauj hwnj dayoz, gvaqlaeng itcig youq rog gunghcoz. Seizneix, song beixnuengx duiyouh le ma ndaw mbanj youq, daengx mbanj vunz cungj nyinhnaeuz song beixnuengx neix dingq bohmeh lij lix seiz daengq, laux le couh ma ndaw mbanj youq, ngoenznaengz hawj goenggeq siuyieng. Gizsaed, baihlaeng miz di saeh gangj mbouj okbak.

Dagozging youq Nanzningz aen gohyenz danhvei gunghcoz, senq youq cibgeij bi gaxgonq couh bingz ndaej fu yenzgiuyenz lo, hoeng itcig daengz duiyouh cungj mbouj ndaej bingz hwnj yenzgiuyenz. Gij saeh neix hawj de lumjbaenz beij vunz noix fajfwngz nei, caiq caeuq gyoengq doengzsaeh haethaemh raennaj, ndawsim de nyapnyuk gag rox. De naemj bae naemj ma, couh ma mbanjranz youq, liz danhvei gyoengq doengzsaeh gyae di, da yawj mbouj raen mbouj simnyap.

Siujgozging itcig youq lajmbanj gunghcoz, daj yangh ganbu menhmenh guh daengz fu yencangj. Geij bi gonq, cujciz dajsuenq anbaiz de dang cwnghez cujsiz, miz vunz naenz de guh seng’eiq. Cujciz diucaz cij rox, de mbouj guh seng’eiq, hoeng caeuq lauxbanj gwn gvaq geij donq haeux, aenvih gijneix de mbouj ndaej dang cwnghez cujsiz, beij daegbeix mbouj ndaej bingz hwnj yenzgiuyenz vanzlij nyapnyuk. Duiyouh le de couh ma mbanjranz youq, lumjbaenz song beixnuengx gaxgonq iekdingh ndei nei.

Ma mbanjranz geij ngoenz, Dagozging couh dawz mbouj ndaej bingz hwnj yenzgiuyenz giz saeh neix lumz seuqsak lo. Seizneix, gyoengq- doih mbouj miz vunz dawz cungj saeh neix venj conghbak, caemh mbouj gangj diegvih sang daemq, byawz fouq byawz gungz. Danghnaeuz doxbeij, cij miz beij byawz ndangdaej ndei. De ndwennaengz couh miz geij cien maenz ngaenzduiyouh, gyoengqdoih mizmbangj baengh lwg ciengx, miz- mbangj vanzlij geng reih ndaem naz, yienghneix beij le de lij miz naj aeuqheiq bingz mbouj ndaej yenz- giuyenz ma?

40 bi gaxgonq youq yozyau vwnzyidui gyoengqdoih caiq comz youq itheij ciengqgo diuqfoux lo. Gyoengqdoih naeuz de, heuh Siuj- gozging daeuj gapbang, doenghbaez youq yozyau vwnzyidui song beix- nuengx neix dang daeuz. De riumbw naeuz:“Daegnuengx gou seizneix vunz dwg duiyouh lo, hoeng ukgyaeuj vanz- lij hwnjban……”

Dagozging gangj mbouj loek. Ma mbanjranz youq le, Siujgozging ngoenznaengz cungj bae reihnaz byaij yawj, lumjbaenz lij dang lingjdauj seiz roengz mbanj bae cazyawj nei. Vunz- mbanj nyinhnaeuz de caengz ndaej baenz vaiq gvaq gvenq gij saedceij duiyouh, gvaq mbouj daengz geijlai nanz de couh lumj Dagozging lo. Cij miz Dagozging yawj ndaej rox, daegnuengx ngoenznaengz bae reihnaz byaij yawj, mbouj dwg caenh gag byaij yawj couh sat lo, haengjdingh yaek guh maz dem.

Geij boux duiyouh baengzyoux daengz ndaw mbanj daeuj cimh Siujgozging. Gyoengqde dajsuenq bau geij cien moux reihnaz ndaw mbanj daeuj guh aen swnghdai nungzcangz ndeu. Vunzmbanj aeu reihnaz ma haeujguj, doeklaeng ngoenznaengz bae nungzcangz hwnjban lingx cienzgoeng, binaengz ciuq reihnaz gujfaen baen- hoengz. Dingq gyoengqde yienghneix gangj, daengx mbanj vunz cungj yaengx song fwngz haenh ndei.

Dagozging ukgyaeuj caengz fanj- ying gvaqdaeuj, daeglwg Siujgozging doq daj diegrog daj denva daeuj, heuh bohlungz gienq boh de gaej luenh guh. Daeglwg Siujgozging naeuz:“Duiyouh le lij gangj ak dem! Gaxgonq dawz ngaenz goenggya bae luenh vit, caem geijlai cungj mbouj sim’in. Seizneix sou gag mbon cienzbau, caem le byawz coengh sou boiz caiq? Dawz gij ndok geq sou dang gim gai cungj boiz mbouj hwnj!”

Aenvih geij bi gaxgonq de dayoz yaek bizyez seiz, daxboh dang yienh lingjdauj, hoeng mbouj ndaej bang de anbaiz gunghcoz, de daengz seizneix vanzlij aeuqheiq, itcig mbouj caeuq daxboh gangj vah. Bingzseiz de miz maz vah couh daj denva heuh boh- lungz caeuq daxboh gangj, daxboh miz maz vah caemh heuh bohlungz daj denva caeuq de gangj, bohlungz couhdwg lenzlozyenz song bohlwg de lo.

Dagozging lwnh gij vah lansai hawj Siujgozging, Siujgozging baeh naeuz:“Duz goep ndaw cingj baenz- lawz ndaej rox aen mbwn miz geijlai hung?”(caengz sat)