fawhndat liengzsisi.

Rumz daj gizlawz daeuj ne? Dwg naengh fwjhau daj henz mbwn gyae’gyae haenx daeuj ma? Roxnaeuz dwg lumj duzroeg miz fwed, daj ndaw ndoengfaex mbin daeuj ne? Mbangjbaez dwg daj giz gou mbouj rox de, caeuq ga dah laj bya guhdoih, byaij gvaq gij roen ngutngut gozgoz de daeuj ne?

Rumz deuz lo, yawj mbouj raen de guhlawz deuz.

Gou yaek bienqbaenz raq rumz mbaeumbengq dahraix, riengz fwjhau gwnzmbwn mbin bae mbin dauq, mbin bae Haijnanzdauj gyae’gyanggyang de bae, aenvih daxmeh bae baihhaenx guh- hong lo. Daxmeh naeuz, Haijnanzdauj ndatyanyan, lij ndat gvaq biengz raeuz bw.

Gyangngoenz, daxmeh bae gwnz ndoibya aeu yw, gou couh riengz laeng daxmeh, hoihhoih ci. Daxmeh couh naeuz, rumz neix liengzsisi bw. Hoeng daxmeh mbouj rox raq rumz neix couhdwg gou, mbouj rox lwg de hix daeuj daengz Haijnanzdauj caemh de youq lo. Mizyinx lai lo, vuenheij lai lo.

Haeujhaemh, daxmeh dajcaemx ndei le, youq baihlaj ronghndwen langh- liengz, gou couh hoihhoih ci byoem de. Daxmeh couh naeuz, liengzsisi bw. Hoeng daxmeh mbouj rox raq rumz neix couhdwg gou, mbouj rox lwg de hix daeuj daengz Haijnanzdauj caemh de youq lo. Mizyinx lai lo, vuenheij lai lo.

Langhnaeuz daxmeh raen mbwq lai, ngeix gou le, gou couh bienqbaenz vunz, ndwn youq dangqnaj de, coemj haeuj ndaw rungj de bae.

Meh couh angqvauvau baenzmaz bae, meh coj yienghneix cam dahraix: Lwg ha, mwngz guhlawz daeuj daengz Haijnanzdauj lwne?

Meh ha, gou mbouj lwnh mwngz nauq, gou gag naeuz mwngz ndwi: “Mwngz gag duenz yawj vei.”

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwg- fwngzmeh/卢奋长 hoiz）