Ciep bouxwnq guenj aen ban neix duenh seizgan ndeu le, gou raen boux hagseng ndaw ban Siujveij maez dwk denswj youzhi, hwnjdangz cungj baiqninz, lij mbouj gangj veiswngh, nienzgeij iqet lij hag rox cit ien gwn laeuj dem.

Gou rox, yaek son ndei Siujveij cungj hagseng miz vwndiz neix, mbouj ndaej doiq de yungh fuengfap aeu geng bungq geng. Itdingh aeu yungh fuengfap ngamjndei, ndigah gou itcig cungj ra seiz gyauyuz habngamj.

Ngoenz neix, gou baez haeuj gyausiz couh yawjraen laj diegnaengh Siujveij miz haujlai nyapnyaj, hoeng gou mbouj cigsoh naeuz de, gou mbouj guh sing byaij daengz aen siujcuj wnq bae, daegdaengq nyinhcaen cazyawj gwnznamh yaep ndeu le naeuz: “Gyoengq doengzhag, cingj gak boux gag genjcaz laj diegnaengh bonjfaenh, miz nyapnyaj couh gip hwnjdaeuj, raeuz aeu bauj gyausiz seuqset, caj lauxsae yawjyawj gizlawz ceiq seuq.”Gou gangj sat le, gyoengq hagseng doxcanj genjcaz seiqhenz diegnaengh swhgeij, caemhcaiq hainduj doengh- fwngz sou gip. Yawjraen daihgya cungj sou gip, Siujveij hix laeglemx caeuq vunzlai doengzdoih guh, swnhfwngz gip gij nyapnyaj gwnznamh, caj daihgya cungj sou gip liux le, gou bek fwngz hemq naeuz: “Ndei lo, hawj gou yawjyawj, bingzbingz yawj.” Yiengh- neix gou hainduj cunzyawj gyausiz, cienq gvaengz ndeu le, gou daengj hwnj lwgfwngzmeh nyaenx mbouj ndaej haenh:“Daihgya cungj guh ndaej gig ndei, seizneix gyausiz seuqset lai lo. ”

Ciep roengzdaeuj, gou dawz lwgda dingzlouz youq gwnz ndang Siujveij, daegdaengq doeksaet dwk naeuz:“Gou lij siengj lai haenh Siujveij baez ndeu, aenvih gou baez daih’it yawjraen laj diegnaengh Siuj- veij baenzneix seuq, maqmuengh mwngz caiq roengzrengz, seizneix hawj raeuz daihgya bekfwngz daj- ciengj de mbat ndeu, ndei mbouj ndei?” Gou daiqdaeuz bekfwngz, gyoengq hagseng caemh gig boiqhab dwk bekfwngz. Siujveij coengzlaiz mbouj caengz ndaej vunzlai baenzneix haenhndei, de sim’angq dangqmaz.

Gvaqlaeng, gou raen Siujveij miz di bienqvaq lo. Seizneix cij aeu gou ngaem gyaeuj cazyawj gij gwnznamh gyausiz, Siujveij caeuq gyoengq hag- seng ityiengh, couh gag rox bae genjcaz gij veiswngh cingzgvang seiqhenz diegnaengh, gyausiz ngoenz beij ngoenz seuqset caezcingq. Gienh saeh neix hawj gou rox, Siujveij yienz- naeuz miz haujlai sibgvenq mbouj ndei, hoeng de hix caeuq hagseng wnq ityiengh, maqmuengh ndaej lauxsae haengjdingh caeuq haenhndei. Yienghneix daj neix dauqlaeng, gou caenhliengh cimyawj caemhcaiq aeu raen gij youhdenj de le haenhndei.

Miz baez ndeu, gou iugouz hagseng youq 30 faen cung dauqndaw boih caemhcaiq mbouj oksing raiz ok duenh vah ndeu, caezgya cungj cagaenj seizgan cunjbei, Siujveij cix gaenjgip baugau naeuz yaek bae veiswnghgenh, gou dangseiz caen cai de dwg mbouj dwg vihliux ndoj boih saw cij ra aen leixyouz neix. Aenvih bae veiswnghgenh, Siujveij beij bouxwnq cunjbei dinj haujlai, de gingqyienz guhsat le aen yinvu caemsij. Gou seizneix cij fatyienh, yienzlaiz gij geiqsingq Siujveij baenzneix ndei. Youq ndaw godangz gou gangjriu naeuz:“Siujveij doengz- hag, mwngz dwg bae veiswnghgenh、 boihsawh、 caemsij sam yiengh hong cungj mbouj nguh ha.” Coenz vah neix lumjbaenz gangjriu, gizsaed dwg gij vah haenh de, yinxhwnj daengx ban angqfwngfwng riu hwnjdaeuj, Siujveij hix daekeiq dwk riu hwnjdaeuj.

Louzsim cazyawj duenh seizgan ndeu le, gou raen gwnz ndang Siujveij miz haujlai giz“rongh”gvaq bouxwnq, lumjbaenz de yungh swzyij cauhgawq naengzlig mbouj loek, maij yindung, lij rox diuq saek di fouxgai dem. Yienghneix gou ciuq gij dwzcangz de,doigawj le di saw rog goqdangz ndeu hawj de, gienq de bauqmingz camgya aen lanzgiuzdui yozyau, dajciengj de hag fouxgai, lij dawz di saeh ndaw ban gyau hawj de bae guh. Siujveij menhmenh souliemx le haujlai, singgwz hix bienq hailangh lai lo.

Mbouj geijlai nanz, hagseng couh yaek bizyez lizhai hagdangz lo, miz ngoenz ndeu gou liuh mbouj daengz Siujveij soengq daeuj mbaw mingz- sinben ndeu, ndawde sij naeuz: “Vangz lauxsae, docih mwngz bineix gvansim caeuq bangcoengh gou, couh lumj daxmeh gou hawj gou raeujrub, mwngz dwgrengz lo, docih mwngz.”

Yawj gij vah lauxsaed simsoh neix, ndaw sim gou raeujrubrub.