Bineix dwg Baksaek Gijyi 90 hopbi. Vih geiqniemh gij goenglauz banlaux gwzming, fatyiengz gwzming conzdungj miznaj caeuq Baksaek Gijyi cingsaenz, mbouj lumz goeknduj, geiqmaenh sawj- mingh, ndwen 10 ngoenz 23 banhaemh, aen hozdung langhbaij fwen song vah doxhuz geiqniemh Baksaek Gijyi 90 hopbi youq Dunghlanz Yen Vujcon Cin Vwnzva Gvangjcangz banh, hozdung youz Swcigih Minzcunghveij cawjbanh, Dunghlanz Yen Vujcon Cin Yinzminz Cwngfuj、Yen Minzyijgiz ciepbanh. Bak lai boux bouxgyaez fwen gak mbanj Vujcon Cin caeuq yanghcin henzgyawj caeuq aen doih yienjheiq gaenxmaenx cujciz cezmuz camgya baijyienj, yienhciengz miz 600 lai vunz yawj yienjok.

Camgya hozdung langhbaij miz 12 cuj(hot) Cuengh、Gun、Yauz daengj vah guekgya doengyungh caeuq fwen vah minzcuz vunznoix、doiq fwen Cuengh、Gun song vah 《Yienghndei Seizdaih Vangz Vwnzsiu》、daihhabciengq banj Cuengh、Gun song vah 《Gou Caeuq Guekcoj Gou》 daengj, neiyungz nangq- daengz Baksaek gwzming lizsij、gij gojgaeq hawj vunz gamjdoengh gwzming senhlez hoenx ciengq、lwgminz Vujcon Cin youq mwh hoenx ciengq guh’ok gungyen youqgaenj、gij saehsaed yienghndei seizdaih Vangz Vwnzsiu、gij cingzcik hung Vujcon Cin ginghci ndawbiengz hwngfat daengj. Daengx aen hozdung langhbaij gaemgaenj cawjdaez, daengx ciengz yienj gij yaem’wenq gyaez guek baenaj goksadsad, yienh- ciengz yinx ndaej bouxyawj dopfwngz haenh, gangjok gij siengjmuengh ndei lwgminz Vujcon Cin hohfuk Cungguek moq laebbaenz 70 hopbi, geiqniemh gij gwzming lizsij ronghlwenq Baksaek Gijyi.

(Cangh Haijyingh)