Raemxlangh haij bongh hwnj gwnz raiq, youh doiq doxdauq.

Raemxlangh haij doiq doxdauq le, youh bongh hwnj gwnz raiq.

Raemxlangh goj dwg duz lwg- nyez gauz, mbouj ngah caemdingh saek yaep nauq, ngoenz youz daengz haemh bae.

Raemxlangh haij bongh hwnj gwnz raiq le, youh deng daihhaij rag doxdauq.

Raemxlangh haij bongh hwnj gwnz raiq baez liux baez moq mbouj daengx mbouj duenh, yaek daeuj gwnz mboek youz dahraix.

Raemxlangh ha, daeuj vei, daeuj gwnz mboek youz vei, riengz gou dauq ndaw byalueg gyaeundei de bae vei.

Gizde miz ndoengfaex lailai geq cungj geq mbouj liux.

Ndaw ndoengfaex miz duzroeg lailai geq cungj geq mbouj liux.

Gizde miz ndoibya heuswdswd.

Gwnz ndoibya miz duzmbajraiz lailai geq cungj geq mbouj liux.

Gwnz ndoibya miz ndokva gyaeundei lailai geq cungj geq mbouj liux.

Lij miz duzrwi gwn ndokva nyaengqnyatnyat nei.

Rumz gwnz ndoibya hoihhoih ci menhmenh ci.

Hoihhoih ci menhmenh ci heiq- hom ndokva sanq bae.

Raemxlangh haij ha, daeuj vei, riengz gou dauq ndaw byalueg bae youz vei.

Ndaw ndoeng yienghyiengh cungj hawj mwngz sim’angq.

Ndaw ndoeng yienghyiengh cungj hawj mwngz gyaezmaij.

Gyangngoenz mwngz louz fiengx le, gyanghaemh couh ndeindei ninz, ninz youq raengzromraemx ndaw lueg. Ninz youq gungxdah youh laeg youh dingh miz ndoengfaexndoek humx youq laj ndoibya ranz gou haenx.

Mwh mwngz yaek dauq daihhaij le, couh caeuq ga dah laj ndoibya de guhdoih. Yienghneix, mwngz couh mbouj lau loek roen lo, goj mbouj lau mbwq lo. Aenvih gadah lae haeuj ndaw haij bae, youq gyang roen cungj angqvauvau guhfwen bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）