“Mbouj miz haeux lo, bae nganz haeux lu!” Moix mbat dingq daengz daxboh gangj coenz vah neix, gou couh nyaenx mbouj ndaej ngeix daengz gienh saeh mizyinx seiziq haenx.

Baez haenx daxboh umj song daeh haeuxgok cuengq gwnz cigingx lo, aeu doi bae nganz. Daxboh song fwngz gaem dawz ganjci, caenh rengz beng ganjci, ci couh menhmenh baenaj lo. Gou cang bang gaem dawz daehhaeux, youq laeng bang gingx ci, hoeng ndawsim gag ngeix dwk: Caj ci roengz lingq le, gou couh diuq hwnjbae naengh, hihi……

Ci yied bae yied vaiq. A! Daengz aen lingq raez le! Gou naj riu lumj dujva, lwgda muengh seiqhenz miz mbouj miz vunz, caiq yawjyawj daxboh fwngz rag ci, de gaenq dawz ganjci daix hwnjdaeuj, song din caenh rengz daemh deih, najaek enj dwk, laengci yaek doh namh, seizneix ndaw sim gou couh angq lo. Song fwngz gaem dawz daehhaeux, gaiq ga ndeu sikhaek daix hwnjdaeuj yaek diuq hwnj gwnz ci bae, cingq youq seizhaenx, cij dingqnyi “bung”sing ndeu, gou naengh haeuj gwnzci la. Gou cij yaek caeg riu, yaep haenx ci couh yaek fan lo, hoeng, gangj seiz haenx, cij raen daxboh fwngz caenh rengz gaemh gyaeujci. O! Ci dauq bingz gvaqdaeuj, mbouj miz saeh lo. Gou danq gaemz heiq raez ndeu, fwngz rub najaek, ndawsim gag nam:“Hu hu hu, hwk dai lo.”

“Mwngz dahlwg neix, naengh hwnj ci hix mbouj lwnh gou nyi, haxbaenh ca di deng fan ci.”Daxboh sim’in youh hozndat dwk naeuz. Gou mbouj nyinhcaen dingq, hoeng, ndaw bak cij han naeuz“Ngwz ngwz.”Gou naengh youq gwnz cigingx, daekeiq dangqmaz, aeu song fwngz iq beng bingz vaqbuh, naengh cingq youq gwnz cigingx, gou couh lumj dahgunghcuj ityiengh. Yawjraen doengzdoih, engqgya daekeiq, menhmenh ndwn hwnjdaeuj, cang yawj funggingj, seiz mbouj seiz aeu fwngz rubrub byoemgyaeuj. “Naengh roengzdaeuj, caj seiz youh laemx lo.” Daxboh daihsing naeuz gou. Gou youh dawz dinbuh hwnjdaeuj, menhmenh naengh roengz- daeuj.

Haeuxsan mbouj miz lo, youh deng bae nganz haeux la, daxboh youh gwed haeuxgok cuengq youq gwnz cigingx. Seiz lwgnyez gvaqbae le cix mbouj rox dauqma. Gij saeh bae nganz haeux seiz caegcaeg diuq hwnj gwnz ci haenx, gou caiq mbouj bae guh lo. Hoeng gou siengjniemh seiz lwgnyez gij saeh caeuq vunz youq ndaw ranznamh lailai bae!

（lauxsae son’gyauq/指导老师 Lungz Gingyi/ 龙庆煜）