Bonjbauq siusik(gicej Cau Dwz- feih) Ndwen 10 ngoenz 26 daengz 27, gaiq nduj daengx gih lauxsae caeuq swhfanswngh Cuengh Gun song vahsaw Vahcuengh son’gyauq bonjsaeh doxdax youz Swcigih Gyauyuzdingh cawjbanh, Nanzningz Swhfan Dayoz ciepbanh haenx youq Nanzningz Swhfan Dayoz banh, Swcigih Gyauyuzdingh Minzcuz Gyauyuzcu cucangj Cinz Yengenh, Nanzningz Swhfan Dayoz Dangjveij cangzveij Liengz Gyahbinh camgya haepmuqsik caemhcaiq gangjvah.

Cinz Yengenh naeuz daengz Cuengh Gun song vahsaw son’gyauq dwg gij gapbaenz bouhfaenh youqgaenj minzcuz gyauyuz gih raeuz, dwg hangh daejyienh minzcuz cwngcwz dangj caeuq guekgya youq gih raeuz ndaej saedhengz, de miz gij cozyung gyagiengz minzcuz doxgiet、swnjcienz caeuq fatyiengz gij cienzdoengj vwnzva maenhndei Boux- cuengh、 son’gyauq daezsang cunghab suciz hagseng Bouxcuengh. Swcigih Gyauyuzdingh cujciz banh gaiq nduj daengx gih lauxsae caeuq swhfanswngh Cuengh Gun song vahsaw Vahcuengh son’gyauq bonjsaeh doxdax, fuengmienh ndeu ndaej engq ndei “yungh doxdax coi hag”, hawj caezgya aen daizheiq doxdax bonjsaeh、langhbaij dungxcaiz ndeu, hawj gyoengq lauxsae Cuengh Gun song vahsaw miz gij heiqfaenh ndei gaenx lienh bonjsaeh、hag ndei bonjsaeh, lingh fuengmienh ndaej “yungh doxdax coi son”, coicaenh hagdangz cietsaed gyagiengz bonjsaeh son’gyauq, cienzmienh daezsang gij caetliengh Cuengh Gun song vahsaw gih raeuz.

Liengz Gyahbinh naeuz daengz Nanzningz Swhfan Dayoz cungfaen yungh gijndei swhyenz guhhong gax- gonq son’gyauq， guh ndei diuzroen guhhong gaxgonq guhhong doeklaeng caezcaemh. Daj bi 2014 hainduj, aen hagdangz neix rapdawz diuzrap son- gyauq dinghyiengq lauxsae Cuengh Gun song vahsaw siujyoz conhgoh cwngzsw daengx gih gauhcungh hainduj, saed- hengz le “aen gunghcwngz son’gyauq lauxsae mizmingz sonhag Cuengh Gun song vahsaw Gvangjsih”, lai baez haiguh son’gyauq lauxsae Cuengh Gun song vahsaw, yinxlingx le gij sonhag hagdangz Cuengh Gun song vahsaw、gohyenz gaijgwz.

Doxdax faen baenz cuj lauxsae caeuq cuj hagseng, gungh miz 88 boux senjsouj camgya doxdax. Ndawde cuj lauxsae dwg 68 boux lauxsae Cuengh Gun song vahsaw 53 aen siujyoz daengx gih 37 aen si(yienh、gih), cuj hagseng dwg 20 boux hagseng dinghyiengq mbouj sou cienz siujyoz gyauyuz ciennieb (Cuengh Gun song vahsaw fuengyiengq) Nanzningz Swhfan Dayoz caeuq Gvangjsih Minzcuz Swhfan Yozyen. Doxdax faen “dajveh sonhag” caeuq “ciuqei hwnjdangz caeuq dajveh raiz hwzbanj” song aen hothoh. Ging- gvaq ngoenz buenq doxdax, gungh bingz ok 8 boux it daengjciengj、18 boux ngeih daengjciengj、 27 boux sam daengjciengj.