Ciuq Swcigih Gauhyen、Swcigih Minzcunghveij caeuq Baksaek Si Cunghyen、Baksaek Si Minzcunghveij mizgven vwnzgen iugouz, haeujlaeg doeksaed 《Aen Diuzlaeh Hong Saw Vah Minzcuz Vunznoix Gvangjsih Bouxcuengh Swcigih》, ndwen 10 ngoenz 17 banhaet, Baksaek Si Yougyangh Gih Yinzminz Fazyen haiguh niemhsawq naengzlig fazgvanh gangj Vahcuengh.

Niemhsawq hozdung youq Baksaek Si Yougyangh Gih Yinzminz Fazyen guh. Baksaek Si Cunggaep Yinzminz Fazyen、Yougyangh Gih Minzcunghgiz mizgven lingjdauj daengz dieg sonyinx guh hong niemhsawq, 5 boux fazgvanh aen yen neix camgya niemhsawq, niemhsawq neiyungz caeuq fuengfap yiemzgek ciuq 《Banhfap Bingzdingh Fazgvanh Cuengh Gun Song Vah》 gvidingh guh, 5 boux fazgvanh camgya niemhsawq cungj doenggvaq liux. Doenggvaq baez hong niemhsawq fazgvanh gangj song cungj vah, caenh’itbouh gyagiengz le dangdieg hwnjguh aen doih fazgvanh Cuengh Gun song vah dangdieg, vih ciuq fap baujcang gij gienzleih lwgminz minzcuz vunznoix yungh saw vah minzcuz bonjfaenh dajgauq dwk roengz giekdaej maenhsaed, doengzseiz hix vih vunzlai Mbanjcuengh gunghawj swhfaz fuzvu engq ndei engq fuengbienh.

(Luz Yuzgangh/陆如刚)