“Aihyo! Meh ya! Dwg bouxlawz mbouj miz lwgda, dawz haiz gou gauj uq lo.”Bouxdoengzhag bakdeih—Suhfwnh naj ndaem dwk daih sing swenj hwnjdaeuj.

“Baenzlawz la? Guh maz lo? Deih loemq ma?”Hungzgingj lienzmuengz ngeux gyaeuj gvaqdaeuj cam, hoeng, dang de raen daengz boux doengzhag bakdeih Suhfwnh hozndat baenz yaek gwn vunz bae, cix rox daengz swhgeij deng raemxmaeg ganghbiz dauj deng haiz Suhfwnh lo, de ngaem gyaeuj le lejsing naeuz：“Dan dwg raemxmaeg deng haiz uq, sing couh lumj vaiz deng gaj nei, ca di dawz rwz gou daenh nuk bw.”

Suhfwnh mbouj dingq lij ndei, baez dingq Hungzgingj baenzneix gangj, engqgya huzndat lo, aen bakdeih de couh yungh ndaej hwnj lo. Cij raen de huhu dwk ndwn hwnjdaeuj, song da yaek beuj dwk caengz Hungzgingj, mboengj daiz dwk daihsing naeuz：“Boux wnq haiz uq le dwg saeh iq, haiz gou uq le dwg saeh hung.”Gangj sat de couh dawz haiz gveng youq gwnz daiz Hungzgingj. “Vaiq dawz haiz gou uet seuq, gou cix nyiuz mwngz.”

Hungzgingj baez dingq de yienghneix gangj, couh deng hwk dwk nyouh yaek conh bae, lejsing naeuz:“Gou youh mbouj dwg daegdaengq guh, haiz mwngz uq le, baema swiq seuq couh ndaej lo.”Seizneix boux bakdeih Suhfwnh baez dingq le, lwgda couh yaek hwnjfeiz nei, yaengx fwngz hwnjdaeuj youh haenq sing hat dwk：“Mwngz caiq gangj mbat ndeu, yawj gou gamj mbouj gamj lemh mwngz.”Hoeng, de youh cuengq fwngz roengzdaeuj lo, ngeix yaep ndeu, dangh- naeuz doxdub couh deng lauxsae dawz bae saemx, de da baez baenq couh unq roengz- daeuj luk Hungzgingj：“Ngoenzneix mwngz famh miz song diuz coih: Diuz he dwg dawz haiz gou gauj uq; diuz he dwg mwngz sag raemxmaeg. Seizneix cijaeu mwngz dawz haiz gou uet seuq, gou couh mbouj caiq fanz mwngz, mboujne……”Hungzgingj baez raen de yienghneix gangj, ndaw sim gag ienqhoij, byawz heuh swhgeij nyangz daengz boux bakdeih, cijndei bang de uet seuq, mienxndaej de caiq nam mbouj dingz.

Ai! Ban dou miz boux vunz bakdeih, dou hix dengcoih, caen maqmuengh de gaij bae.

（lauxsae son’gyauq: Lungz Gingyi/龙庆煜）