Siujfanz mbouj dwg hagseng ban gou, hoeng de caeuq gou gig ndei, cungj lizmboujhai gou. Neix miz baez ndeu sawq gangj goq, de lumjbaenz haemq maij gij fuengsik gou hwnj dangz haenx, ndigah roengzdangz le daegdaengq nai gou, caemhcaiq aeu gij lienzhaeh fuengsik gou, yienzfaenh couh yienghneix hainduj lo.

Hoeng Siujfanz yinxhwnj gou louzsim, dwg aenvih de dwg boux“hek ciengzseiz”daeuj bangunghsiz, de gingciengz deng banhcujyin cingj haeuj ndaw bangunghsiz. De dwg boux vunz mbouj fug vunz, caih banhcujyin baenzlawz gangj, de mbouj gangj saek coenz, banhcujyin ciengzseiz ndatheiq dwk gangj mbouj ok vah bae.

Miz ngoenz ndeu, Siujfanz gingqyienz doengh fwngz dub sieng boux hagseng sai beij de lij sang gyaengh ndeu, aenndaeng hagseng sai ok lwed, gwnz naj lij miz giz riznyauj hung iq. Daxmeh hagseng sai hujdengdeng ganj daengz hagdangz, iugouz Siujfanz boiz 300 maenz cienzyw. Meh Siujfanz youq mwh Siujfanz gig iq couh gvaqseiq lo, daxboh ciengznienz youq baihrog dajgoeng, de caeuq daxgoeng daxbuz geq gvaq saedceij, banhcujyin cij ndei cingj daxgoeng 80 lai bi haenx daeuj hagdangz. Goeng de rox gienh saeh neix le, ndatheiq baenz gangj mbouj ok vah, fid fwngz couh dauqbae lo.

Mbouj miz banhfap, Siujfanz daj dienhvah heuh daxboh de bangcoengh, siengj mbouj daengz daxboh youq ndaw dienhvah hix ndatheiq lai couh ndaep dienhvah bae. Mbat neix, Siujfanz simvueng dahraix, hoeng de lij cangguh caemdingh naeuz:“Cienz gou itdingh hawj mwngz, gou aeu yungh di seizgan he bae ra.” Ginggvaq banhcujyin naihsim hezdiuz, daxmeh hagseng sai dauqdaej cij cengqgengz doengzeiq.

Gou dingqnyi gienh saeh neix, daegdaengq ra daengz Siujfanz, cam de baenzlawz guh. Siujfanz naeuz:“Menhmenh rom cienz.” Ndaw vah de mingz- yienj saenqsim mbouj cuk. “Mwngz gamj rapdawz cwzyin, gij neix lauxsae haenh mwngz. Hoeng gij beizheiq mwngz gvaqlaeng aeu gaij, mbouj ndaej daih cungdoengh.” Gangj sat, gou daj ndaw daeh dawz 300 maenz ngaenz okdaeuj hawj de, “gij cienz neix lauxsae ciq hawj mwngz gonq, mwngz baezlaeng menhmenh boiz gou couh ndaej lo.” Mbangj dwg siengj mbouj daengz gou ciq cienz hawj de, de doeksaet lai, liuxle lwgda yawj gou lumjnaeuz docih gou, de sing iq doiq gou naeuz:“Docih lauxsae, gij cienz neix gou itdingh boiz mwngz …… ”

Aenvih gienh saeh neix, dou song boux doxdepgyawj haujlai lo, gou seizseiz cungj gvansim de, de hix ciengzseiz ra gou gangjgoj, caeuq gou caemhyiengj gij angq de. Miz ngoenz ndeu, banhcujyin de angqvauvau lwnh gou nyi, ngoenz- lwenz cuengqhag le，gyoengq doengzhag cungj baema lo, gingqyienz yawjraen Siujfanz boux vunz ndeu lij baet veiswnghgenh, neix hawj de doeksaet raixcaix, banhcujyin baez daih’it youq ndaw bangunghsiz haenh de lo. Gou dawz gij vah banhcujyin cienzbouh gangj hawj Siujfanz dingq. Caemhcaiq doiq de daengj fwngzmeh, de gingqyienz miz di najmong dwk naeuz:“Dawz gij cienz lauxsae bae gaijgez vwndiz, dangyienz hawj lauxsae raen miz maqmuengh bw.”

Gou caen yawjraen maqmuengh dahraix, baez ndeu byaujyangz, hawj Siujfanz ndaej gujli, doenghngoenz saedceij baihlaeng, de biujyienh ndaej engqgya maij guh gaenxguh, yienznaeuz mizseiz lij mizdi cungdoengh guhsaeh, hoeng beizheiq lai iq raeuh lo. Siujfanz mizdi cinbu, lauxsae dou da cungj yawj ndaej raen.

Ngoenz cietlauxsae haenx, Siujfanz daegdaengq soengq mbaw hohgaj caeuq fung saenq ndeu hawj gou, gwnz gaj sij miz coenz vah neix:“Youq ndaw sim gou, mwngz couh lumj daxmeh ityiengh, cingj saenq gou, gou mbouj hawj mwngz saetmuengh.”Gaxgonq dwg boux lwgnyez manz, gingqyienz gangj ok duenh vah neix, ndaw sim gou fwt mizdi raeujrub ndeu, gou yaengyaeng mbekhai byuksaenq, ndawde dwg daeb ngaenzlingz ndeu. Ngamj dwg 300 maenz ……