Gaxgonq, ndaw ndoeng miz haujlai doenghduz iq. Ndawde noucoengz、bitlwg、 malwg dwg baengzyoux ndei, gyoengqde seizseiz guhdoih guhcaemz.

Miz ngoenz ndeu, noucoengz caeuq malwg itheij dik cuzgiuz. Bitlwg ginggvaq gizneix raen le, couh cam：“Gou hix caeuq sou doxcaez guhcaemz, ndaej lwi?”Noucoengz caeuq malwg nyouq deng gwnz ndang bitlwg miz heiq- haeusing, mbouj ngeix saek yaep couh caemh coenz gangj：“Mbouj ndaej, mwngz uq lai lo.”Bitlwg naeuz：“Raeuz dwg baengzyoux ndei, baengzyoux ndei wngdang doxgiet doxgyaez, doxhuz youqndei.” Noucoengz naeuz：“Mwngz uq lai lo, haeungenge, raeuz caiq mbouj dwg baengzyoux ndei lo.”Bitlwg byaij deuz lo, doq byaij bae ranz doq siengsim daejnganga.

Ngoenz daihngeih caeuq ngoenz daihsam, bitlwg cungj mbouj bae ra noucoengz caeuq malwg guhcaemz. De cungj youq ndaw ranz youq mbouj okbae, nyapsaebsaeb.

Ngoenz daihseiq, bitlwg bae ndaw dah dajcaemx, de aeu dawz bonjfaenh swiq seuqsetset bae, caiq bae ra noucoengz caeuq malwg guhcaemz. Sawqmwh, bitlwg dingqnyi malwg youq henzhamq swenj：“Gouqmingh ha, noucoengz doek dah lo, gouqmingh ha！”Bitlwg baez dingq le couh rouzri rouzrit ndaem roengz lajraemx bae, dawz noucoengz doz youq gwnz laeng de, soengq noucoengz hwnj hamq bae lo.

Noucoengz ndaej gouq lo, de doiq bitlwg gangj：“Bitlwg, docih mwngz gouq mingh gou, mboujne gou couh dai youq ndaw dah lo.”“Mbouj yungh docih gou, neix dwg gou wnggai guh.” Bitlwg han. Malwg hix doiq bitlwg naeuz:“Doiq mbouj hwnj bitlwg, gaxgonq raeuz mbouj wnggai baenzde doiq mwngz, cingj mwngz yienzliengh. Mwngz gangj ndaej deng, raeuz dwg baengzyoux ndei, raeuz dwg baengzyoux ndei, baengzyoux ndei wngdang doxgiet doxgyaez, doxhuz youqndei.” Bitlwg naeuz：“Mbouj youq- gaenj, raeuz lij dwg baengzyoux ndei.”Gangj sat, sam boux baengzyoux ndei fwngz beng fwngz, doq ciengq doq diuq, vuenheij dangqmaz.

Daj seizneix dauqlaeng, sam boux baengz- youx ndei neix ngoenzngoenz guhdoih, vaiqvued dangqmaz.

(lauxsae son’gyauq: Vangz Gveiyangh/黄桂香)