Seiz lwgnyez lumj fuk dozveh ndeu, ndaw dozveh miz bi’ndwen haj saek raeuz; seiz lwgnyez seih diuz go ndeu, ndawde miz vuenyungz raeuz; seiz lwgnyez dwg bonjsaw, ndawde geiq miz saeh nanzlumz raeuz.

Geiq ndaej gou roek bi seizhaenx, gou caeuq daxmeh youq ndaw gyanghongh gangjgoj, seizhaenx gou yawjyawj ronghndwen gwnz mbwn, gig geizheih dwk cam：“Vihmaz ronghndwen youq gwnzmbwn mbouj deng doek roengzdaeuj? Dwg mbouj dwg deng Cangzngoz yungh gyauhsuij nem la?”

Daxmeh riu dwk han naeuz：“Wngdang ba?”

“Dahcej Cangzngoz miz gyauhsuij geijlai geizheih ha! De youq gizlawz cawx ne?”

“Neix gou couh mbouj rox lo, mwngz bae cam de ba?”

Gou doiq gwnzmbwn daihsing hemq:“Dahcej Cangzngoz, mwngz bae gizlawz cawx gij gyauhsuij haenx?”

“Daxmeh, dahcej Cangzngoz mbouj han gou.”

“Dahcej Cangzngoz ninzndaek lo, gaej cauz de, raeuz hix baema ninz ba.”

Gou ninz youq gwnz mbonq fan bae fan dauq ngeix：“Dahcej Cangzngoz vihmaz aeu dawz ronghndwen nem youq gwnzmbwn? Ronghndwen hojlienz lai lo! Cijnwngz youq gwnzmbwn, mbouj ndaej roengzdaeuj caeuq dou guhcaemz.” Gou ndawsim gag lwnh swhgeij, caj ronghndwen doek roengzdaeuj le, gou couh dawz de yo hwnjdaeuj, mbouj hawj dahcej Cangzngoz caiq dawz de daiq baema.

Daj ngoenzhaenx hwnj, moix haemh gou cungj buet bae gyanghongh caj yawj ronghndwen doek roengzdaeuj mbouj caengz. Miz baez ndeu, gou caj ndaej hozhawq lo, couh bae coh gangraemx aeu raemx daeuj gwn. “Aiyo! Ronghndwen doek ndaw gangraemx lo.” Gou daihsing hemq hwnjdaeuj, hoeng youh sikhaek haep bak haeuj, lau Cangzngoz dingqnyi le youh dawz de daiq deuz. Gou yaemyaem aeu song aen bat, cacaemj dawz ronghndwen lauz hwnjdaeuj, youh sikhaek aeu aen bat wnq goemq ndei, lau de buet deuz, gou mienh umj de miemh doiq de gangj:“Ronghndwen ha ronghndwen, gou mbouj dwg vunzvaih, dwg daeuj gouq mwngz, gaej lau.” Gou dawz ‘ronghndwen’ cuengq youq ndaw rug. Hoeng, gou hai daeuj caiq yawj seiz gaenq mbouj raen lo, ndaw bat cij lw miz raemx. Gou simnaiq lai bae ra daxmeh, lwnh daxmeh nyi:“Ronghndwen buet deuz lo, de mbouj haengj caeuq gou guh baengzyoux.”

Daxmeh dingq le geizheih dwk cam:“Gyawz miz ronghndwen, de mbouj dwg venj youq gwnzmbwn ma?”

“Mbouj dwg, de doek youq ndaw gang lo.”Gou mienh gangj mienh rag daxmeh bae daengz henz gang, fwngz vix dwk naeuz：“Neix mbouj dwg ronghndwen ma?” Daxmeh rox dwg gijmaz saeh lo, daihsing riu hwnjdaeuj naeuz：“Mwngz yawj gwnzmbwn.” “Yi, gwnzmbwn vihmaz lij miz aen ronghndwen? Itdingh dwg meh ronghndwen.”Daxmeh dingq le riu ndaej sing engqgya sang lo, naeuz：“Gwnzmbwn ronghndwen dwg caen, ndaw gang ‘ronghndwen’ dwg aen ngaeuz de.” Gou doiq gij vah daxmeh buenq saenq buenq ngeiz, youh naeuz：“Gang youh mbouj dwg gingq.” Gangj sat couh iet gyaeuj yawj ndaw gang bae, mbouj loek, daxmeh gangj ndaej mbouj loek. Hoeng gou lij siengj dawz ronghndwen gouq roengzdaeuj, gou cijndaej doiq ronghndwen “doiqsied.” Gou doiq gwnzmbwn daihsing hemq:“Rongndwen ha rongh- ndwen, gou mbouj ndaej gouq mwngz roengzdaeuj, doiq mbouj hwnj lo.”

Gienh saeh neix gvaq geij bi lo, haujlai saeh gou cungj lumz ndaej seuqsat, dan miz gienh saeh neix gou geiq ndaej cingcingcujcuj. A, seiz lwgnyez gou guh saehhuk caen bamz ha! Moix mbat dauqngeix hwnjdaeuj, cungj nyaenx mbouj ndaej riu lo.

O! Saeh lwgnyez caen hawj vunz nanzlumz!

（lauxsae son’gyauq: Lungz Gingyi/龙庆煜）