De siujyoz bizyez le, couh mbouj doeg cuhcungh le, couh youq ndaw ranz guhhong.

Binaengz ndwencieng, gyoengq hagseng okrog bae doegsaw haenx, cungj yienj saek song haemh heiq. Daxniq caemh hwnj daiz bae eu fwen:

“Ngoenznaengz aeu cat faenz,

Conghbak caen cing sangj;

Ciengzseiz gaenx cat ndang,

Ndang cangq bingh mbouj

daengz.

Swiq fwngz cij gwn haeux,

Nengzbingh mbouj nem ndang;

Dwgliengz gaej yungh gangz,

Sim gvangq mbouj youheiq.

Swnghcanjdui raeuz ndei,

Baengh de ndaej gwndaenj;

In de ceiq youqgaenj,

Gaej yungh baenjbot de.”

Miz geij baez, Beixhaj aeu ngeih- yienz buenx dwk, gyoengqvunz yawj heiq cungj bekfwngz roeproep.

Mbouj daengz geij lai bi, Daxniq youq ndaw swnghcanjdui gaenq dwg boux caixhangz guhhong ndeu. Ciemz gyaj ndaem naz, vanq bwnh ndai naz, byoq yw cawz non, gvej haeux fad haeux, yienghyiengh cungj guh ndaej. Simjngeih doengh gyoengq mehmbwk ndaw swnghcanjdui, bouxboux cungj haenh sab haenh seb.

Daengz swnghcanjdui aeu caz- yanghgih ma ndaem naz, Daxniq ciengzseiz caeuq Beixhaj gap yungh aen cazyanghgih ndeu. Gwn haeux- ringz caemh doxgap gwn, mwngz gwn bat gou, gou gwn bat mwngz. Mwhde gyoengqdou couh yawj ok di riz he lo, hoeng caemh mbouj miz vunz dawz haeujsim geijlai.

Gaenlaeng, Daxniq couh deng ndaw yienh baij bae Yinznanz son vunz dawz cazyanghgih.

Dauqma le, ndaw mbanj couh cienz dwk byaeuzbyuedbyued. Yaep ndeu dingqnyi naeuz Daxniq yaek haq hawj Beixhaj, yaep ndeu dingqnyi naeuz de yaek diuh bae Namzningz guh ganbu.

Gvaq le geij bi, miz haemh ndeu, Daxniq daeuj ndaw ranz Beixhaj, naeuz:“Go’haj, ciuhneix raeuz mbouj ndaej doxhab youq itheij, ciuhlaeng ba! Mwngz couh gaej niemh gou baenzlai, cimh bouxwnq vuenvuen heijheij gvaq saedceij ba!”

Ngoenz daihngeih, couh dingqnyi naenz Daxniq haq daengz Ginhcouh bae lo.

Gaenlaeng, itcig mbouj dingqnyi gij siusik Daxniq saekdi, geij noix raen de dauqma.

Daengz gaenlaeng, gaijgwz hai- langh, reihnaz bau guh daengz hoh, dajndaem dajciengx gag guhcawj, aen mbanj dou cungj bienq ndaej gyaeundei raixcaix, gwndaenj hix mbouj you, gak hoh cungj miz ci- gyauzceh lo.

Aiq youq bi 2010 gonqlaeng, Daxniq sawqmwh daeuj daengz ndaw mbanj. De buet daengz laj goreiz, raen Beixhaj daz ngeihyienz, couh cung haeujbae, youq dangqnaj vunzlai couh daej naeuz:“Go’haj, gou haih mwngz lo!”

Beixhaj mbat doeksaet he, vaiq dawz ngeihyienz cuengq roengzma, mbouj rox yaek baenzlawz gangj cij ndei:“Mbouj haih! Mbouj haih! Gou ndei! Gou ndei!” Gyoengq bouxlaux roxnyinh aen ciengzmienh neix, dwg sam seiqcib bi dailix doxbiek, vaiqdi boenq gyoengq hauxseng caeuq lwgnyez youq laj goreiz guh’angq gangjgoj deuz, caih song boux de doxcomz donq gaeuq gonq!

Daihngeih ngoenz, Daxniq daeg- daengq doiq geij boux bouxlaux gangj. De haq bae caemh dwg ranz haemzhoj he. Gaijgwz hailangh le, baengh daj- ndaem dajciengx caemh fouq hwnj- daeuj lo. Gij lwg de hix miz ceiqheiq, mwh ngamq gaijgwz hailangh, couh bae Gvangjdungh dajbuek, seizneix ma Namzningz hai gunghswh. Geij bi gaxgonq, goenggvan de dai le, couh bae Namzningz caeuq lwg de youq.

Gvaq saek ndwen le, Daxniq daiq daeglwg hung de dauqdaeuj, banh soujsuz, hwnq ranzmoq. Doeklaeng ranz baenz le, Daxniq hix youq roengzdaeuj lo.

Aen ranz neix cang le cueng- bohliz, 4 bangx ciengz bae ndaej biegsisi, ronghsagsag, gwnz dieg bu cienmeng ndaej raeuzmyig dangqmaz.

Daxniq couh iu Beixhaj haeuj ranzmoq bae youq.

Bouxcoz mbouj rox gij gojgaeq song boux de, cungj naeuz Beixhaj 70 bi cij aeu yah.

Haeuj ranzmoq le, gyoengqvunz youq ndawranz nyaengqfoedfoed. Gij lwglan lungzau Beixhaj caeuq gij lwg daeggo daegnuengx Daxniq cungj nyaengq diep doiq, cauj byaek cawj noh. Beixhaj caeuq Daxniq it hoh it hoh bae cingj gyoengq bouxlaux:“Ngoenzneix gij lwg yaek daeuj yawj song boux dou, gvaqbae caeuq gwn gaemz haeux he.”

Banringz, haj roek aen ci- gyauzceh dingz youq bakdou ranz, roengzma saek 20 lai vunz.

4 gvanbaz gij lwg Daxniq daiq gij lan de daeuj lo.

Youq gwnz daiz laeuj, daeg lwghung Daxniq naeuz:“Daxmeh dauqcungz laebbaenz aen gya moq neix, gyoengqdou angq raixcaix. Boh- laeng couhdwg bohcaen. Gyoengqdou gunghoh song boux de. Gaenlaeng song boux de gij gwndaenj, dou bau lo. Hoeng dou mbouj ndaej ngoenz- ngoenz youq henz ndang songde, couh muengh gak boux beixnuengx ganq lo.”

“Boh! Meh! Raeuz ndaejhoengq ciengzseiz daeuj yawj faenhsou! Seiz yaek dauqma, sou yaek gwn maz couh gangj hawj sou cawx dauq. Muengh sou song boux laux ndang cangq vuenyungz!”

Ngoenz ndeu banringgvaq, caez- gya guhhong sat le couh youq laj goreiz yietbaeg, gangjgoj, dingq Beix- haj daz ngeihyienz. Geij bouxlaux hix yungx Daxniq eu fwen. Daxniq doi mbouj gvaq, couh eu hwnjdaeuj:

“Byoem hau ndaej doxbungz,

Caen vuenyungz dahraix;

Sanhbwz caeuq Yinghdaiz,

Caiq mbouj ngaiz doxliz.”

Beixhaj hix aeu ngeihyienz buenx dwk, gij singyaem rwenzrubrub, ndeidingq dangqmaz. Gyoengqvunz caiq mbouj gangjgoj lo, hix ngengrwz haeujsim dingq, daengz Daxniq eu sat le couh bekfwngz roeproep.

（sat）