Ndwen 10 ngoenz 1, youq aen hozdung angqhoh Cunghvaz Yinzminz Gunghozgoz laebbaenz 70 hopbi, gij yenzsu Gvangjsih youq ndaw aen doih soujduh guekgingq vunzlai youzbyaij ronghlwenq, aen cilaisaek “Gvangjsih Gyaeundei” riengz Gaicangzanh, daj doeng coh sae hai gvaq baihnaj Denh- anhmwnz, ciepsouh bouxdaeuz dangj caeuq guekgya diemjyawj, langhbaij gij yienghsiengq moq seizdaih moq Gvangjsih gyaeundei hawj daengx guek lwgminz、seiqgyaiq lwgminz yawj.

Aen hozdung guekgingq youzbyaij aen cawjdaez dwg “caemhsim hwnjguh aen loqsiengj Cungguek”, daih’iek 10 fanh boux vunz 70 cuj cilaisaek gapbaenz 36 aen doih caeuq 3 aen cingzgingjsik byaij, riengz Gaicangzanh daj doeng coh sae ginggvaq baihnaj Denh’anhmwnz, yungh gij hingzsik “swyouz、sengdoengh、angqyangz、hozboz” gangjok gamjcingz.

Ciengq fwen ndeidingq hwnj- daeuj, diuq foux angqyangz hwnjdaeuj, vut aendomq gikleih hwnjdaeuj! “Gvangjsih gyaeundei, dieg bya dah ndei, minzcuz doxhuz, vwnzva gyaeu- ndei.” Yienhciengz gejnaeuz cienz daeuj, riengz dwk dij yaem’wenq goksag, aen cilaisaek Gvangjsih hai gvaqdaeuj lo, aen cilaisaek cang gij hohfuk Gvangjsih 5600 fanh gak cuz lwgminz doiq guekcoj hungmbwk haenx, mboujdan aeu langhbaij Gvangjsih bya heu raemx saw、vwnzva gyaeundei, engq aeu langhbaij Gvangj- sih gyaeundei hailangh cauhmoq、doxgiet huzndei、gyaeundei vuenyungz.

Aen cilaisaek Gvangjsih mingzcoh dwg “Gvangjsih Gyaeundei”, cawjdaez dwg “cauhlaeb aen Gvangjsih gyaeu- ndei saedyienh aen loqsiengj fuk- hwng”, dajveh doed ok le gij cingjdaej dinghvih “cwngcising、biengzdiegsingq、seizdaihsingq caeuq minzcuzsing”. Aen cilaisaek aeu gij bya dah Gvei- linz gyaeundei gvaq lajmbwn haenx guh cawjdaej, gangjok gij leixniemh Gvangjsih swnghdai gijndei dij gvaq ngaenz、bya heu raemx saw couhdwg byagim bya’ngaenz. Yiengh bya dwg yiengh saeusinglangh, caemhcaiq hwnjroengz fouxdoengh, daejyienh Gvangjsih dwg fwenhaij, dwg mbanj- ranz Liuz Sanhcej.

Aen cilaisaek yungh gij yenzsu gig miz deihfueng daegsaek caeuq minzcuz daegsaek Gvangjsih. Aendomq haj saek yienh’ok Gvangjsih yiedcingz angqcoux bouxhek gak dieg. Man- cuengh gyaeundei lai saek caeuq aennyenz angqyangz gikleih yienh’ok gij simcingz angqyangz Gvangjsih gak cuz lwgminz angqhoh Cungguek moq laebbaenz 70 hopbi. Haijdunz haj saek caeuq daengdoengzfungh, yienh- ok Gvangjsih dwg aen dou youqgaenj doxrangh ndeindei “rangh ndeu loh ndeu”. Gvangjsih Hozbuj dwg cogeiz aen baksok hainduj diuzroen seicouz gwnz haij Cungguek, aen daeng- doengzfungh daj gizneix vat okdaeuj haenx gaenq daejyienh le gij leixniemh vanzbauj. Ndoeng oij gwnz aen cilaisaek, mboujdan daejyienh Gvangj- sih soq guh dangz ciemq daengx guek 2/3, hix biujyienh Gvangjsih gak cuz lwgminz youq seizdaih moq neix ndwenngoenz vuenyungz.

Gwnz aen cilaisaek, bouxcoz daiqbiuj 12 aen minzcuz cojyouq neix ndang daenj buhvaq minzcuz, fwngz gaem aendomq, soengqlaex hawj guekcoj. Gij yienghsiengq Gvangjsih gak minzcuz huzndei caezyouq、doxfuz doxbang、huzndei hwngfat、doxgiet baenaj, youq gwnz naj gyoengqde yienh okdaeuj.(Ciengj Linz)