“Lwg ha, ngoenz neix gou cawx di baeu ndeu daeuj, yaepdem raeuz naengj duz gwn!”Daxmeh angqfaengz le riuj daeh baeu ndeu baenzneix naeuz. Ndei lai! Gou ceiq gyaez gwn la! Baez ngeix gij nohbaeu youh singjsien youh baenzgwn, gij gyaeqbaeu noh biz mbouj raen nyinx, gou couh ndwnj myaiz gyoeggyoeg bae. Gou naihsim caj bat baeu naengj ndei le hoengz lumj makdoengj nei, muengh bae muengh dauq couh muengh vaiq di ndaej gwn gijgwn ndei neix.

Daxmeh goeb aen vanj ndeu coq ndaw cauq bae, ronq geij gep hing, swiq gij coeng bok ndei haenx seuq bae, hai le gaiqgven meizgi. Gou raen geizheih couh yawj le doenghduz lix ndaw bwnzraemx neix, gyoengqde aj bak ning nyauj, boq fugfauz okdaeuj, angqfaengz benz bae benz dauq. Gyoengqde cien naemj fanh ngeix hix ngeix mbouj daengz, swhgeij yaek dai lo……

Gou sawqmwh raen mizdi dawzcoih：Raeuz vihliux ndaej gwn gij baenzgwn, couh oemq doenghduz lix neix dai bae, yakrwix lai. Gou vanzlij mbouj rox baenzlawz guh、simnae simnaiq, danhseih gyoengq baeu de senq deng faj fwngz hung daxmeh vit haeuj ndaw rek bae lo.

Feizmbaw dawz mbouj dingz, yawj gvaq gaiq farek bohliz bae, gou raen gyoengq baeu ndaw rek indot lai bongh bae bongh dauq、cak hwnj cak roengz. Gvaq yaep ndeu, lwgda gyoengqde menhmenh bienq mong lo, daengx ndang menhmenh bienq hoengz, gij saek mongheu haenx menhmenh mbouj raen lo, miz di gabaeu menhmenh loenq ok. Neix daengz ndaw rek caemhrwk caez le, daxmeh gwet farek hwnj, heiqhom bongh haeuj ndaeng daeuj, baenz duz baenz duz baeunaengj baiz youq lajda, vanzlij miz dong“fwngz raek gen goenq”hung ndeu.

Seizneix, gou ngawzvaeg le yawj bat baeu hoengz lumj makdoengj neix, baenzlawz hix gwn mbouj roengz……

（Linz Hungzyij）