Vunzraeuz bouxboux cungj hoz- haenz saek yiengh doxgaiq, miz vunz hozhaenz boux miz cienz lailai, miz vunz hozhaenz bouxdoengzhag cingzcik maenhndei……Danhseih gou ne, ceiq hozhaenz doenghgij fwj hausaksak youq gyang mbwn mbin bae mbin dauq.

Mwngz itdingh cam gou vihmaz hozhaenz fwj, neix gou youq gizneix lwnh hawj mwngz dingq ba. Gou dwg boux siujhagseng ndeu, seizneix doeg haj nienzgaep, haeuj nienzgaep sang lo, deng hag saw lai lai, govwnz、cihsiz hix lai naek lai hoj, ngoenzngoenz cungj lij miz cozyez haemq lai. Cuengqhag ma ranz, gou cungj raen baenzdong cozyez le simnyap lai. Vunzraeuz cungj miz seiz mbouj angq. Mizseiz deng lauxsae ndaq, caeuq doengzhag doxceng, daengzlaeng cungj simnyap simyou ndwi. Hw! Gou muengh gou ndaej lumj fwj ityiengh mbouj rox simfanz、mbouj miz saehyou, mbouj you mbouj fanz nei mbin bae mbin dauq, da yawj roengz gwnzdeih baihlaj raen sengmingh mwnhoengh rengzrwd neix.

Gangj caen, gou mboujdan hozhaenz fwj mbouj nyap mbouj fanz, vanzlij hozhaenz de caih youq caih bae. Gou dwg boux hagseng nienzgaep sang, couh ngoenzngoenz deng youq ndaw hagdangz, caemsim hwnj ndei moix dangz goq, roengzdangz le naengh youq diegnaengh guh cozyez, miz saek seiz ndaej yawj aen cauhcangz ndit rongh ndei haenx yaep ndeu, hix raen sim’angq lai lo. Cuengqhag dauq ranz le, guh bouxgvai dingq vah bohmeh, haenqrengz guh cozyez; cozyez guh liux le lij deng hag haujlai doxgaiq wnq. Couh yienghneix le, ngoenz liux ngoenz dem、bi liux bi dem, duenh lwgnyez hong nyaengq guh mbouj liux neix couh gvaqbae lo. Yienznaeuz baenzneix guh ngoenz- ngoenz cungj gvaq ndaej saeh rim sim ndaet, gou hix rox neix doiq gou ndei, danhseih gou vanzlij maqmuengh swjgeij lai ndaej gag gaemguenj di, ndaej gag guenj saeh swhgeij, couh lumj fwjhau siengj bae Baekging yawj Singzraez Fanh Leix couh bae Baekging; naemj bae Gyanghsuh yawj gingj couh bae Gyanghsuh; yaek caeuq gyoengq bouxdoih guhghemh- ndoj couh guh; siengj gag youq mbouj ning le yawj aen seiqgyaiq gyaeundei neix couh yawj. Fwj siengj bienq baenz duzyiengz couh bienq; siengj bienq baenz duzdouq hau couh bienq……Gou hix maqmuengh guh cozyez ndei caez le, lij miz di hoengq okbae youz, bae yawj aen seiqgyaiq gyaeundei neix.

Gou hozhaenz fwj mbouj you mbouj fanz, hozhaenz fwj caih youq caih bae, gou lij hozhaenz fwj seizlawz cungj ndaej doek raemxfwn hawj vunzlai, hozhaenz fwj seizlawz cungj ndaej hawj vunzlai angqfaengz, hozhaenz fwj……

Fwj gvaq ndaej ndei yinx gou hozhaenz. Danhseih gou hix rox, mbouj miz bouxlawz ndei caez, hix mbouj miz cungj saedceij lawz ndei caez. Vunzraeuz mbouj ndaej hoz- haenz ndwi, vanzlij aeu gyaep ndaej gij doxgaiq hawj raeuz hozhaenz haenx, caemhcaiq ciuq aen fueng- yiengq haenx bae haenqrengz guh. Gou gag saenq, langhnaeuz gou haenqrengz hagsib, daengzcog baenz boux doiq vunzlai miz yungh haenx, daengz seizhaenx, mbangj fwj hix hozhaenz gou bw!

（Bungz Yizvwnz）