Beixhaj gangj:“Aeu cazyanghgih ndaem naz, miz gij ndei de. Vunzsai caemh ndaej ndaem naz. Aen seizdaih naj coh doemnamh hwet coh mbwn gvaqbae caiq mbouj dauqma lo! Hoeng hix miz gij mbouj gaeuq, nep gyaj mbouj yinz, yaek aeu vunz comj gyaj.”

Laujmoz heuh Simjngeih gangj vah. Simjngeih naeuz:“Mbouj gangj lo! Bae yietnaiq gonq!”

Beixhaj

Beixhaj gij coh de heuhguh Vangz Beizvuj. De youq ndaw ranz de baiz daihhaj. Baenzneix dou couh heuh de guh Beixhaj, caemh miz vunz heuh de guh Gohaj. De cuhcungh bizyez le, ngamq roeb “Vwnzva Dagwzming”, cij ndaej maranz guh- hong. Seizhaenx de cae naz rauq naz mbouj miz faenh, ndai naz vanq bwnh mbouj daengz ndang, dawz rap cungj caengz rox dawz, baenzneix swngh- canjdui couh hawj de bae suijlidui guhhong. De youq ndaw dui rox ciengq rox foux, dwg boux senhconzyenz he. Gyoengqdou ndaej yawj de daz ngeihyienz gvaq.

Gaenlaeng ndaw dui cawx cazyanghgih le couh heuh de ma dawz cazyanghgih. Baezde guh doxdax ndaem naz, de couhdwg baih aeu cazyanghgih ndaem naz boux he, doeklaeng hai hoih cungjgez couhdwg de gangj vah ndaej hawj Simjngeih mbouj rox buek maz dauq.

Aeu cazyanghgih ndaem naz, gij gyaj ceiq hawj vunz gyaeuj in. Mwhde, gyoengqdou fonx gyaj dwg aeu naz- raemx doek ceh. Yienghneix fonx gyaj, raggyaj raez lai, danghnaeuz nep gyaj nep mbouj ok, couh yaek lai aeu boux vunz he daeuj comj gyaj.

Bi gaenlaeng, Beixhaj couh gag fonx gyaj. Ngeix ok gij fuengfap lekraemx he: Daengz yaek ciemz gyaj le, dawz gij raemx ndaw naz baiz hawq bae, raggyaj nyieg le, ciemz hwnjdaeuj gij rag couh gat. Mbouj miz raggyaj raez, nep gyaj couh mbouj deng nep hoengq lo.

Gij gisuz neix youq ndaw dadui doigvangq, gij cazyanghgih ndaw dadui couh bouxboux nyienh yungh caez lo.

Dingqnyi naeuz dadui yaek senj de guh saefouh bae diegrog son vunz dawz cazyanghgih, hoeng cwngsinj mbouj gvaq. Daxboh de mwh hoenx Yizbwnj seiz, dang lauxsae gvaq, caemhcaiq hix dang cunhcangj gvaq. Daxboh de vih vunz Yizbwnj fuzvu gvaq, baenzneix de couh mbouj ndaej luenh okrog.

Gyoengqdou haengj caeuq de guh’angq, youh diuqfoux youh ciengq go, riunyumj rabrab, ndeimaez fouzbeij.

Beixhaj ngah yawj saw. Gwnz daiz gwnz congz ndaw rug de cungj miz haujlai saw. Dou ciengz bae fanfan foekfoek yawj gij saw de daeuj gaijmbwq. Hoeng haujlai saw dou cix yawj mbouj roxyiuj, lumj 《Cwngci Ginghci Yoz》 caeuq 《Gauhdwngj Suyoz》 doengh bonj saw neix.

Daxmeh de gaenj hawj de aeu yah, hoeng de cungj mbouj dawz haeuj rwz. Daengz meh de dai lo, de lij caengz aeu ndaej yah.

Doeklaeng hoizfuk gauhgauj. Gyoengqdou hix nyoengx de bae cam- gya gauhgauj. De naeuz:“Gyoengq- sou caen dwg aux ma haeuj cah. Gou aeu maz bae gauj ne?” Gvaqlaeng seizde dadui hix mbouj miz geij boux vunz bae camgya gauhgauj.

Gaijgwz hailangh le, Beixhaj gag guh gag gwn. 80 nienzdaih, de mbouj rox bae gyawz ra ndaej bonj 《Sawloih Cuengh Gun》 ndeu, ndaejhoengq le, couh gag mboen gag sij.

Miz ngoenz ndeu, dou youh bae ndaw rug de guhcaemz, dingqnyi de gag doegngangngang:“Aen mbanjranz gou geiq ndaej haenx mbouj cungj dwg yienghneix. Aen mbanjranz gou ndei lai lo. Hoeng gou aeu geiq ndaej gij gyaeundei de, gangj gij ndeicawq de okdaeuj, cix mbouj miz saekdi riz, mbouj miz saek coenz vah lo. Lumjbaenz hix dwg yienghneix ndwi lo. Ndigah gou gag gejgangj: Aiq mbanjranz hix dwg yienghneix ndwi lo, —— yienznaenz mbouj miz maz cinbu, aiq hix mbouj miz gij siliengz gou roxnyinh, gijneix cij dwg aenvih simcingz gou bienq lo, aenvih mbatneix gou dauqma, bonjlaiz couh mbouj miz saekdi simcingz ndei——”

Dou mbat yawj, yenzlaiz dwg bonj saw 《Mbanjranz》 Luj Sin sij, Beixhaj aeu Vahcuengh daeuj doeg.

Seizneix, Beixhaj gaenq ndaej 70 lai bi lo, gij reihnaz de co hawj lauxbanj lo. Cwngfuj hwnj song fungh ranz hawj de, ndwenndwen fat ngaenz hawj de. De ngoenznaengz dawz aen ngeihyienz he youq laj goreiz bak- mbanj daz gaijmbwq. Gyoengqdou dingq le, roxnyinh de caen dwg maenh’ak, daz ndaej ndeidingq raix- caix. Baez de daz ngeihyienz, yaephe couh miz vunz humx youq henz ndang dingq, mboujguenj bouxlaux roxnaeuz lwgnyez, mboujguenj daegmbauq rox- naeuz dahsau. Ndaw mbanj yaek hawj de ndwencieng hwnj daizheiq bae daz. De cix doi naeuz:“Gij suijbingz gou, cij hab ndaej youq laj goreiz gaijmbwq ndwi lo, gyo’mbaiq gyoengq beix- nuengx mbouj roxnyinh coegrwz, baenzlawz ndaej hwnj daiz bae biujyienj ne?”

Dou seizneix vanzlij heuh de guh Beixhaj.

Daxniq

Daxniq seng youq mwh Dujgaij seiz, veh ranz de baenz goqnungz.De mbouj rox saw, lienz Vahgun cungj mbouj rox gangj. Dujgaij gunghcozdui gaenq yaek beizyangj de guh ganbu, yienznaeuz de hongreih hongnaz caeuq dajndaem dajciengx doenghgij hong neix guh ndaej maenh’ak raixcaix, hoeng, de gangj vah gig ca, gangj ndaej dwddwd daddad, yaek gangj mbouj gangj, dingq byongh ngoenz cungj mbouj rox de yaek gangj maz.

De daj seiziq couh deng vunz heuhguh Daxniq lo. Daengz bae haeuj hag lij heuhguh Daxniq. Haeuj hag le miz boux Vangz lauxsae naeuz:“Daxniq, gou ciuq gij doegyaem Vahcuengh neix sij gij coh Sawgun hawj mwngz. Gij coh Sawgun mwngz baenzneix sij——达妮.” Daxniq mbouj rox gangj Sawgun geijlai, hoeng, eu fwen ndeidingq raixcaix, caemhcaiq ok bak couh baenz hot.

Haeuj hag daeuj doegsaw,

Gox rug sawq buh moq;

Dangh gyanghaemh yahndoj,

Doq lumh hix doq riu.

（caengz sat）