Geij bi neix daeuj, Hozciz Si doengh aen bouhmonz guh hong vah minzcuz caeuq minzcuz cungfaen fatok ciznwngz cozyung, roengzrengz bauj- cang gij gienzleih gak minzcuz yungh caeuq hwngfat saw vah bonjfaenh, cauhlaeb gij ndwenngoenz vah ndawbiengz lai cungj vah huzndei, aeundaej cingzcik yienhda.

Gyagiengz senhconz cwngcwz, gamduk、gveihfan fanhoiz caeuq ndawbiengz yungh Sawcuengh. It dwg doenggvaq bauqceij、densi、vangjloz daengj meizdij, caeuq “sam nyied sam Bouxcuengh”、 doengh aen hozdung ndwen senhconz minzcuz doxgiet cinbu daengj, gvangqlangh senhconz gij cwngcwz fapgvi saw vah minzcuz, gyalai cingzsoq roxyiuj gij cwngcwz saw vah minzcuz. Ngeih dwg youq doengh gij hozdung angqhoh laebbaenz aen yienh gagguenj, fanhoiz、saemj- dingh、genjcaz gamcaz gak cungj byauhyij Sawcuengh, caenhliengh yungh gveihfan caeuq cingqdeng Saw- cuengh. Sam dwg youq minzcuz hozdung ciengz beigingj、byauhyij、baiz dazroen daengj cujciz yungh Cuengh Gun song cungj saw.

Doicaenh Sawcuengh haeuj mbanj haeuj hagdangz, gya’gvangq gizdieg hong saw vah minzcuz. Boiq- hab aen bouhmonz guhhong gyauyuz guh ndei hong Sawcuengh haeuj hagdangz, haenqrengz haeujcoengh aen bouhmonz guhhong gyauyuz caeuq hagdangz Sawcuengh haiguh gak loh hozdung sonhag Sawcuengh, hagdangz sawsonhag、diegsuen hagsib yungh Cuengh Gun song cungj saw, youq dieg guhyiengh minzcuz vwnzva haeuj hagdangz daengx si, coh hagdangz、diegsuen hagsib、senhconz byauhyij daengj cungj gveihfan yungh Cuengh Gun song cungj saw.

Haiguh hong hwnjguh guhyiengh song cungj vah huzndei, coicaenh ndawbiengz yungh saw vah minzcuz. Youq Dunghlanz Yen Vujcon Cin haiguh hong guhyiengh Cuengh Gun song cungj saw vah huzndei caemh- youq. Hingzcwng gunghvu、gunghgung fuzvu, ciuq vunzlai aeuyungh gangj Cuengh Gun song cungj vah; gak cungj hozdung, gaenxmaenx cujciz “song vah” hingzsik, baiz geiqhauh dieg gunghgung yungh Cuengh Gun song cungj saw. Doenggvaq doenghgij hong caeuq hozdung neix, hawj gizdieg ndawbiengz yungh saw vah minzcuz mboujduenh gyalai.

Banh gak cungj vah minzcuz doxdax、aen ban son’gyauq, gyagiengz gij yinxdaeuz saw vah minzcuz. Gonqlaeng banh le aen ban son’gyauq Sawyauz、“cungh siuj hagseng yungh Vahcuengh、Vahmauznanz、Vahgun gangj gojgaeq doxdax”、 aen ban son’gyauq canghfwen Sawcuengh, fungfouq gij hingzsik saw vah minz- cuz.

(Liengz Minjbingz)