Bonjbauq siusik(Cau Dwzfeih Liengz Cingz) Ndwen 9 ngoenz 14 banhaet, Gaiq Daihcib’it Daengx Guek Siujsoq Minzcuz Cienzdoengj Dijyuz Yindungvei doxciengj bauqva ceng mingz daih’it youq Cwngcouh Dayoz banh. Buenq ciengz gonq aen doih Baekging 1∶0 lingxdaeuz, aen doih Gvangjsih boux ciengj ak、duicangj Liuz Yungjli deng sieng roengz ciengz. Buenq ciengz laeng haiciengz mbouj nanz, aen doih Baekging youh ciengj ndaej aen bauqva ndeu, 2∶0. Aen doih Gvangjsih mbouj doeknaiq saekdi, buekmingh ciengj, doenggvaq baez doxgap ndeindei ndeu ciengj ndaej aen ndeu, riengz dwk youq mwh hoenxgung doiqfueng famhgvih, ndaej vut baez bauqva roengz lamz ndeu, beijfaen 2∶2. Gya seiz 6 faen cung song mbiengj mbouj ndaej saek faen, lij dwg 2∶2, doeklaeng doenggvaq vut bauqva roengz lamz faen saw hingz, aen doih Baekging vut 5 baez vut deng baez ndeu, aen doih Gvangjsih vut 4 baez vut deng 2 baez, doeklaeng aen doih Gvangjsih 4∶3 ciengj hingz aen doih Baekging, souj maenh mingz daih’it, aeu ndaej it daengjciengj faenliengh ceiq naek gaiq minzcuz yindungvei neix.

Ciuq cam rox, aen doih Gvangjsih caeuq aen doih Baekging dwg duisouj geq lo. Gaxgonq 4 gaiq daengx guek siujsoq minzcuz cienzdoengj dijyuz yindungvei, aen doih Baekging 4 baez ndaej ciengj mingz daeuz ngeih, 3 baez saw aen doih Gvangjsih, dan youq bi 2011 hingz baez ndeu. Neix dwg song aen doih baez daihhaj youq daengx guek siujsoq minzcuz yindungvei ciengj mingz daeuz ngeih doxbungz. Gaiq yindungvei neix, song aen doih youq siujcujsai hix doxbungz gvaq, aen doih Gvangjsih 5∶3 ndaej hingz.