Bonjbauq siusik (gicej Cau Dwzfeih Liengz Cingz) Ndwen 9 ngoenz 16 banhaemh, Gaiq Daihcib’it Daengx Guek Siujsoq Minzcuz Cienz- doengj Dijyuz Yindungvei haepmuqsik youq Cwngcouh Si Aulinz Bizgwz Dijyuz Cungsim banh, aen minzcuz yindungvei doxdax 9 ngoenz neix guhsat lo, gyoengq yindungyenz 34 aen daibyaujdonz、56 aen minzcuz, youq Cwngcouh caez doxdax, gyanaek cingzngeih.

Youq gwnz gizdieg yindungvei doxdax, gyoengq yindungyenz gak cuz Gvangjsih youq mwh doxdax haenq- rengz buekguh, ceng’aeu mingz daeuz, mbouj lau boux ak, doxdax langhbaij bonjfaenh, doxdax ok suijbingz ndei, langhbaij le gij yienghsiengq dijyuz daudwz ndei caeuq gij suijbingz doxdax ak, ciuq dajveh doxdax sat 13 aen hanghmoeg doxdax caeuq 8 aen hanghmoeg biujyienj, aeu ndaej 62 loh ciengj, ndawde it daengjciengj 10 aen, ngeih daengjciengj 25 aen, sam daengjciengj 27 aen, cienzbouh ciengj mauhgvaq gaiq gonq （gungh 51 loh ciengj, ndawde it daengjciengj 4 aen、ngeih daengjciengj 18 aen、sam daengjciengj 29 aen）, aeundaej gij cingzcik ceiq ndei daj bi 1991 Gaiq Daihseiq Daengx Guek Siujsoq Minzcuz Cienzdoengj Dijyuz Yin- dungvei doxdaeuj haenx, gyau mbaw- gienj habhoz ndeu hawj Swcigih Dangjveij、Cwngfuj caeuq daengx gih gak cuz lwgminz.

Youq mwh haepmuqsik, aen cujveijvei Gaiq Daihcib’it Daengx Guek Siujsoq Minzcuz Cienzdoengj Dijyuz Yindungvei lij senhbu mingz- dan ndaej Gaiq Daihcib’it Daengx Guek Siujsoq Minzcuz Cienzdoengj Dijyuz Yindungvei daudwz fungh- sangciengj dem, Gvangjsih Daibyauj- donz goj miz mingz. Doxcomz 9 ngoenz、buekguh 9 ngoenz、angqhoh 9 ngoenz, riengz dwk singgo 《Haenh- ciengq Guekcoj》 menhmenh ciengq sat, gaiq yindungvei neix hix hai sat lo. Hoeng cingz mbouj gat, dauqfanj eiq engq laeg, baez neix doxbiek dwg vihliux baez laeng doxcomz, bi 2023, Haijnanz doxraen moq!