Bonjbauq siusik (gicej Cau Dwzfeih Liengz Cingz) Ndwen 9 ngoenz 8 banhaemh, Cunghvaz Yinzminz Gunghozgoz Gaiq Daihcib’it Siujsoq Minzcuz Cienzdoengj Dijyuz Yindungvei haimuqsik youq Hoznanz Swngj Cwngcouh Si Aulinz Bizgwz Dijyuz Cungsim cingqsik haidaiz. Gvangjsih Daibyaujdonz youq aen haimuqsik laebdaeb ca mbouj geijlai song aen cungdaeuz neix biujyienj ndeiyawj, hawj vunz nanzlumz, gwnz haimuqsik, 34 aen daibyaujdonz haeujciengz ndeiyawj caeuq 56 aen minzcuz biujyienj miz daegsaek, yienhciengz nauhyied dangqmaz. Ndawde Gvangjsih Daibyauj- donz youq mwh haeujciengz biujyienj minzcuz、biujyienj gofoux caeuq siujsoq minzcuz daibyauj caezcaemh diemjdawz bogfeiz caen yinx dahraix, hawj vunz yawj dwk lwgda cungj mbouj yaep.

Gaiq daengx guek minzcuz yindungvei neix haimuqsik faen baenz bien gwnz bien laj. Bien gwnz dwg 34 aen daibyaujdonz baizdoih haeujciengz, caemhcaiq dingz youq 30 miux biujyienj cezmuz miz minzcuz daegsaek. Dangguh aen donzdui daihnduj haeujciengz, Gvangjsih Daibyaujdonz cingsaenz gvaekgvaek okdaeuj ndaej daengz bouxyawj yienhciengz dopfwngz haenh, biujyienj 30 miux aennyenz caeuq aen dingzdingj miz daegsaek le, yienhciengz bouxyawj youh dopfwngz roebroeb haenh gyoengqde. Haimuqsik bien laj yienjheiq faen baenz 《Danqhaenh Cunghvaz》《Hoznanz Ok Yiengh》 caeuq 《Gotumj Siengjmuengh》 sam bien. Cawz langhbaij gij lizsij vwnzva ronghlwenq caeuq yienghsiengq cingsaenz gvaekgvaek Cwngcouh le, gak minzcuz beixnuengx fwngz doxcing, yienj minzcuz doxgiet haenqguh, doengh gij ciengzmienh biujyienj caezcaemh haenqguh baenaj hawj vunz gikdoengh.

Cit heiq ceiq hawj vunz gamjdoengh haenx dwg beixnuengx 56 aenz minzcuz fwngz gop raemx mbanjranz, caemhcaez ungganq gofaex caemhrag Cunghvaz. Gomaksigloux sangvid cangqcoek haenx dawzmak nuengjrumx, beixnuengx gak cuz hopheux humxgyongx, beijlumj 56 aen minzcuz caez couq Cunghvaz minzcuz gungdungzdij, gak cuz beix- nuengx lumj cehmak maksigloux nei doxgot ndaet- fwdfwd.

Vwnzyi biujyienj sat le, bogfeiz yindungvei gaiq neix youq gyoengq boux yindungyenz mizmingz haenx doxciep lajde bae daengz laj dapbogfeiz, diemjdawz aen dapbogfeiz rog ciengz dawz foengxoo, sing angq hemq sing dopfwngz ndaw ciengz riengzdwk yiengj gyokgyadgyad.

Daengx guek minzcuz yindungvei dwg aen ciethoengh lwgminz gak minzcuz doxcomz、engq dwg aen daizheiq langhbaij biujyienj gak minzcuz dijyuz vwnzva. Youq mwh haimuqsik, Gvangjsih Daibyauj- donz yungh gij cingsaenz ndei、buhvaq minzcuz gyaqciq、biujyienj ndeiyawj langhbaij le lwgminz Mbanjcuengh lauxsaed gyaeundei caemhcaiq dox- giet haenqguh. Ciuq cam rox, gaiq siujsoq minzcuz yindungvei neix, Gvangjsih gungh baij 451 vunz bae Cwngcouh, dwg gak gaiq daengx guek minzcuz yindungvei ndawde caeuqfaenh vunz、caeuqfaenh hanghmoeg doxdax ceiq lai ndeu, caeuqfaenh 13 aen hanghmoeg doxdax caeuq 8 aen hanghmoeg biujyienj, ceng’aeu youq mwh doxdax ndaej cingzcik ndei, soengqlaex hawj Cungguek moq laebbaenz 70 hopbi.