Daengz seizcou lo, raemx ndaw rij mboek raemx gig feuh lo, cingq dwg seiz ndei gonh bya.

Yaek bae gonh bya gaxgonq, dou geij lwgnyez bae cunz rij gonq. Dou nyinhnaeuz duenh rij lawz miz bya, couh youq duenh rij baihgwnz caep diuz fai iq ndeu laengz raemx, baenzneix le youq duenh rij baihlaj homh diuz fai, dawz raemx ndaw fai gonh hawq, couh ndaej gaeb bya lo.

Gonh bya dwg aen gunghcwng hung ndeu, hung naek youh dwgrengz, caemhcaiq aeu vunzlai caez guh. Mbangj vunz fucwz daj ndaw naz vat namh daeh daengz ndaw rij dong baenz fai, laengz maenh raemx rij duenh baihgwnz; mbangj vunz fucwz gonh hawq raemx ndaw vaengz baihlaj fai; mbangj fucwz gaeb bya. Sam mbangj vunz, danghnaeuz mbangj lawz guh menh cungj mbouj ndaej lo.

Gij vunz caep fai aeu mbouj dingz mbouj duenh coh gwnz fai dem namh, mboujnex raemx muenx gvaq dingj fai, fai lak le, couh bae rengz ndwi lo. Gij vunz gonh bya aeu vaiq, yaek ganj youq fai lak gaxgonq gonh raemx hawq. Gij vunz gaeb bya engq aeu vaiq, bya’ndoek ceiq hoj gaeb, gyoengqde dingzlai cungj ndoj youq congh gamjrin、gamjnamh ndaw rij, ndaej baenz aen baenz aen congh mbon aeu. Caiqlix bya’ndoek gig raeuz, lij miz song diuz geiz soemset ciengz coeg fwngz vunz ndaej lwedriri. Vihliux mienx deng geizbya coeg sieng, dou aeu bak roengq goemq youq baihnaj bakcongh, caiq yungh faex- gyaengh gyaep bya ndaw congh haeuj ndaw roengq.

Hix miz seiz saetbaih, lij caengz ndaej gaeb bya, fai baihgwnz lak lo, raemx ndaw vaengz yaek gonh hawq haenx, sikhaek dauq rim raemx lo. Da yawj gij ciengzmienh aen fai lak raemx hungmbwk, caiq yawj vunz ndaw vaengz yienghnyaenq, daihgya mbouj- danh mbouj nyap, dauqfanj caez angq hemq “yahhi——”, hwk ndaej duz- lingz gwnz bya mbouj rox fatseng maz saeh, hix mbouj dajnauh lo. “Yahhi” dwg gyoengq vunzlaux lajmbanj youq seiz coux bawx gwn laeuj angq cij hemq, gyoengq lwgnyez dou guh’angq ndaej ceiq angq seiz, hix hag yiengh vunzlaux hemq.

Seizcou dou youq ndaw rij gonh bya couhdwg yienghneix vaiqvued、yienghneix angqyangz!