Mozit Daihvuengz dwg gojgaeq- saenz ndaw sim Bouxcuengh. Youq dieg baihbaek Guengjsae, Bouxcuengh dawz Mozit Daihvuengz dangguh saenzlingz gunghawj, aen ham ndaw ranz laeb miz aen saenzvih Mozit Daihvuengz.

Binaengz liggaeuq roek nyied co’ngeih, dangdieg lij miz ngoenzciet cienmonz hawj Mozit Daihvuengz hwnjyieng, couhdwg “Ciet Mozit Daihvuengz”, hix heuhguh “Ciet Miuh Cauh Haeux” “Mozit Daihvuengz Guh Vuengz” roxnaeuz “Ciet Saenz- betmiuh”. Ndawde, suenq ranghdieg Gyanghlungz、Liujgyangh ceiq hwng. Cienzgangj ngoenzneix dwg ngoenz- seng Mozit Daihvuengz, aenvih de gouq Bouxcuengh miz goeng, caemhcaiq baujyouh gohaeux ndaej fungsou, Bouxcuengh vih docih aen- daek de, couh youq bakmbanj hwnq miuh、ndawranz cunglaeb saenzvih.

Youq Gvangjsih Liujcouh Yungzanh Yen, cix miz aen cienzgangj wnq. Doxcienz bi 16 Hungzvuj (Denhsun vuengzdaeq), Mozit Daih- vuengz caeuq 6 boux ciengqlingj doengzcaez daengz Gvangjsih Cangz- anh bingz gij luenh vunzyak. Seizhaenx, bing vunzyak souj youq dah baihsae, Mozit Daihvuengz couh gag daiq geij bak bing hoenx gaxgonq, naengh aenruz、aensaz doh gvaq dah baihsae. Bing vunzyak raen guenbing daengz haenz, couh dawz gyoengqde humx hwnjdaeuj hoenx gaj, buek bing neix deng gaj dai caez lo. Dangseiz, Mozit Daihvuengz lij youq ndaw dah, seizneix raemxdah nyoenx hwnj sang, aen ruz de boihseiz deng fan, couh dai lo.

Denhsun vuengzdaeq dingqnyi naeuz le ndatheiq raixcaix, roengz lingh gaj dai 6 boux ciengqlingj, gyoengq guenhak naeuz gaj mbouj ndaej, caiq hawj vuengzdaeq gangj hawj 6 boux guenbing neix daiq coih laeb goeng, hanhgeiz ndwen ndeu ndawde hoenx baih bing vunzyak. Yienghneix, gyoengqde bwh le baenz cien baenz bak aenruz aensaz, haj haij Lungzvuengz baujyouh, youq haj nyied ngeihcib bet hauh dawz bing vunzyak gaj dai lo.

Daihgya vihliux geiqniemh Mozit Daihvuengz, moix bi liggaeuq roek nyied co’ngeih aeu faengxhajhaij、5 boi laeuj、caeuq song duz bit (duz cug duz lix) 、gaeq geij yienghneix daeuj caeq de, cungj fungsug neix daengz seizneix gaenq miz geij bak bi lo.

Ngoenz ciet neix, dahsau bae haq cungj dauqma ranzdaiq, caeuq beix- nuengx doxcomz, caencik baengzyoux hix daeuj gwn haeux, daihgya caez suek faengx, naengj lwgmanh, gaj gaeq gaj bit, loengh gwn baiq coj.

Youq yienh Yungzanh, aenvih ngoenzneix dwg ranz Siuh baiq coj ceiq hoengh, gyoengqde hix heuh de guh “Cietranzsiuh”. Vunz ranz Siuh cungj dwg Bouxcuengh, gij ham ndawranz laeb miz coh Mozit Daih- vuengz. Gyoengqde mbouj gvaq ngux nyied co’ngux, Cietranzsiuh ndaej suenq guh ciet ngux nyied co’ngux gyoengqde. Cietranzsiuh itdingh aeu miz faengx. Hamh faengx ca mbouj geijlai, hoeng gij yiengh faengx mbouj doxdoengz, gawq mbouj dwg sam gak hix mbouj dwg seiq gak, cix dwg haj gak, yienghceij lumj aen daezyiengz, ndigah heuhguh“faengxdaezyiengz”, youh heuhguh “faengxhajhaij”, caeq cungj faengx neix, maqmuengh sim gohaeux fungsou、seiq geiq bingzan. Dingqnaeuz “faengxdaezyiengz” dwg ranz de gag miz, cij miz gyoengqde ndaej gwn. Danghnaeuz vunzrog loeng gwn lo, couh aeu caeuq vunz ranz Siuh caez gvaq roek nyied co’ngeih.

Itbuen youq dingdangz (yangh- hojdangz) baiq coj, youz doengh boux geq daiq, faen baenz caeq cug caeq ndip, aeu youq gwnz daiz baij gaeq ndip、bya ndip caeuq di laeuj, 5 aen “faengxdaezyiengz” baiz caezcingj. Mwh caeq cug, gij doxgaiq gwnz daiz aeu vuenh baenz byaekcug. Caeq lix caeuq caeq cug ca mbouj geijlai, youz bouxlaux diemj yieng gonq, baek yieng youq gwnz faengx, caiq raix laeuj hawj boi, baenzneix dem laeuj sam baez. Caeq ndip caeuq caeq cug sat le, baiq coj cij suenq guh baenz.

Gvendaengz gij laizloh Ciet- ranzsiuh, ndawbiengz lij miz lingh aen cienzgangj dem. Doxcienz youq 300 bi gaxgonq, Yungzanh caeuq Yungzsuij gvi Yungzyen. Diegneix haeujok dingzlai baengh ruz. Cangz- anh Cin baihgwnz dwg Gveicouh baihlaj dwg bak haij, doxgaiq seiq fueng bet baih comz sanq youq neix, gig mwnhoengh. Hoeng, hix aenvih diegvih de ndei, ciengzseiz deng caeg deng ciengj. Vihliux gij ancienz bonjfaenh, gyoengqde laebbaenz le duivuj ndeu, hoeng aenvih mbouj miz geijlai ginghyen, mbouj dingj ndaej maz saeh.

Doeklaeng baihgwnz baij boux cienghginh ndeu guh bouxdaeuz gyoengqde, dawz duivuj gyahung, youq ngux nyied co’ngux gaxgonq bae dwk bingcaeg, youq roek nyied co- ngeih ngoenzde dwk hingz lo, bek- singq dangdieg ndaej gvaq gij saedceij an’onj lo. Boux cienghginh neix heuhguh Siuh Cungfu, aenvih dwk bingcaeg mbouj ndaej gvaq ngux nyied co’ngux, vunz lajmbanj youq ngoenzneix bang de bouj gvaq. Youh aenvih de dwk bingcaeg miz goeng, baihgwnz ciengj de 18 aen mbanj, youq seizneix Mbanjmehndei、Mbanj- roenhanq caeuq Mbanjsamdou daengj dieg duh Yungzanh Yen. Seizneix gij vunz singq Siuh youq Nanzgyangh 18 aen mbanj cungj dwg gij lwglan de, ndigah Cietranzsiuh youq dangdieg gig hwng.

Gyonj hwnjdaeuj gangj, mbouj- lwnh heuhguh “Ciet Mozit Daih- vuengz” roxnaeuz “Cietranzsiuh”, cungj dak miz gij maqmuengh Bouxcuengh dangdieg gouz aeu fwnraemx cuk、haeuxgwn ndaej demsou、 doihduz maj hwng.