Ndwen 8 ngoenz 27 banhaet, Aen Ban Son’gyauq Sawcuengh Ganbu Minzcunghveij Hidungj Bi 2019 youq Gvangjsih Ginhyungz Cizyez Gisuz Yozyen cingqsik haiban. Swcigih Minz- cunghveij mizgven cusiz、gak mizgven si、yienh(si) aen bouhmonz guhhong minzcuz cunghgyau saw vah minzcuz、Aen Cungsim Yenzgiu Saw Vah Minz- cuz Gvangjsih、Cungguek Minzcuz Yijvwnz Fanhyizgiz、Gvangjsih Minzcuz Bause、Gvangjsih Sam Nyied Sam Cazcise daengj danvih bouhmonz gungh 25 boux bouxhag caeuqfaenh baez son’gyauq neix.

Baez son’gyauq neix youz Swcigih Minzcunghveij cawjbanh, Gvangjsih Ginhyungz Cizyez Gisuz Yozyen ciep- banh, muzdiz dwg gvancez doeksaed gij cingsaenz 《Fueng’anq Hengzguh Gvangjsih Bouxcuengh Swcigih Gvan- cez Doeksaed 〈Gij Yigen Doicaenh Hong Ganbu Dieg Minzcuz Hag Song Vah〉》, doidoengh son’gyauq ganbu Cuengh Gun song vah, gyagiengz hwnjguh aen doih vunzcaiz Cuengh Gun song vah, fugsaeh gij saehnieb saw vah minzcuz hwngfat.

Baez son’gyauq neix guh 36 ngoenz, son daengz ndwen 9 ngoenz 30 sat. doiq gij cingzgvang dingzlai bouxhag mbouj rox Sawcuengh Vah- cuengh geijlai, gocwngz neiyungz laebmiz 《Aen Diuzlaeh Hong Saw Vah Minzcuz Vunznoix Gvangjsih Boux- cuengh Swcigih》 daengj cwngcwz fapgvi saw vah minzcuz, yaemvah、fapvah、sawloih Sawcuengh Vahcuengh daengj giekdaej cihsiz, fapgiuj fanhoiz Cuengh hoiz Gun, aenyaenq、baiz daengj fanhoiz giekdaej cihsiz, faensik yawjngonz gij yisuz vwnzva vahgangj conzdungj maenhndei minzcuz vunznoix Gvangjsih daengj, caemhcaiq cingj lauxhangz Sawcuengh Vahcuengh Gvangjsih Sam Nyied Sam Cazcise、Gvangjsih Saw- cuengh Hagdangz daengj danvih daeuj hwnjdangz, hawj son’gyauq engq miz cimdoiq caeuq ndeiyungh.

(Veiz Cauh)