Ndwen 8 ngoenz 22 daengz 25, vih caenh’itbouh daezlienh vwnzva gijgwn bonjdieg、fungfouq huq lijyouz, Ningzmingz Yen youq aen cin iq Dunghmungz Byaraiz cujciz banh gij hozdung Ciet Gijgwn Ndei Lijyouz Vwnzva Gozci Byaraiz. Hozdung miz “doxdax guh gijgwn ndei daegsaek Byaraiz” “baij gai gijgwn ndei Dunghmungz”“baij gai huq lijyouz vwnzva”“ciet ciengqgo aen cin iq Dunghmungz Byaraiz gaiq daihngeih” daengj.

Youq ngoenz 24, haiguh “doxdax guh gijgwn ndei daegsaek Byaraiz”, aen yienh neix cujciz aen bouqlaeuj dangdieg mizmingz、giyez guh gijgwn、boux gagguh caeuq daengx yienh 13 aen yanghcin caeuq 3 aen nungzgyahloz vazgyauz nungzcangz daengj aen giyez guh gijgwn, gak senj soengq byaek roxnaeuz gijgwn iq miz deihfueng daegsaek haenx 2 loh doxhwnj camgya doxdax, youz boux sug dajcawj Aen Hezvei Dajcawj Guengjsae dang bingzveij yienhciengz hawj faensoq.

Ngoenzhaenx, hozdung yienhciengz vunz lai dangqmaz, nauhyied raixcaix. Boux dajcawj roengzsim guh gijgwn ndei daeuj camgya doxdax, moix loh byaek baij buenz cungj gig ndeiyawj, homfwtfwt, hawj gyoengq bouxhek haenh mbouj dingz mbouj duenh.

(Luz Dezsanh Liuz Sejvaz/陆铁山 刘雪华)