Ndaw sim mwngz miz nyapnyuk lwi? Mwngz roxnyinh naetnaiq lwi? Danghnaeuz baenz neix, mwngz couh byaij coh daihswhyienz ba! Hawj gij gingjsaek gyaeundei daihswhyienz swiq gij nyapnyuk caeuq naetnaiq mwngz bae caez, hawj mwngz bienq ndaej soengdetdet.

Ndaej buet haeuj haeuj ndaw rungj goengq bya bae! Muengh bae gig gyae, bya doxlienz mbouj duenh, roxnyinh gyoengq bya mbouj sang geijlai. Hoeng, byaij daengz lajdin bya, ngiengxgyaeuj iet hoz baez yawj, gingqyienz muengh mbouj raen dingj- bya, caen hungloet! Bya mbouj lau rumz bongj fwn rwed, mbouj lau ndit dak nae goemq, ciengxlwenx maenh- dwddwd ndwn dwk, geijlai bi gvaqbae lij dwg yienghneix!

Ndaej lauh coh henz haij bae! Youq gwnz roen couh ndaejnyi gij sing raemxlangh fubfed mbouj daengx. Loh din byaij hwnj sadan, raemx- langh baed mwngz, roxnyinh cwxcaih dangqmaz! Haij, lumj gaiq baengz saeklamz daengj youq baihnaj, de aek gvangqlangh, soucomz raemxdah daj seiq fueng bet baih daeuj.

Ndaej byaij coh diegnywj bae! benq diegnywj hwnj miz go’nya baenz mbong, heuswdswd. Gwnz diegnywj lij hai miz gij va mbouj rox coh, hoeng gij ndeigyaez. Danghnaeuz haeujsim cimyawj go’nywj iq, lij fat- yienh gyoengqde lumj gyoengq bing, mboujguenj byawz baenzlawz caij、at, doeklaeng gyoengqde cungj rox menh- menh enj hwet hwnjdaeuj, laebdaeb maj ndaej mwncupcup, mbouj rox utfug.

Daihswhyienz dwg baengzyoux raeuz, danghnaeuz mwngz ndaej- hoengq, itdingh ndaejgeiq bae caeuq de guhcaemz!