“Raen nuengx byaij gvaqdaeuj,

Gaeuj lumj dahsien sau,

Bak beix mbouj rox ndau,

Mwngz gaej naeuz bw nuengx.”

Mbiengj mehmbwk eu:

“Siensau youq gwnz mbwn,

Dah nuengx ndwn lajdeih,

Haemhneix daeuj cimh beix,

Miz fukheiq rox ndwi.”

Daegsam eu:

“Reihnaz gaej yungh you,

Cae rauq gou bau loengh,

Nuengx miz sim daeuj coengh,

Itdingh hoengh gvaq vunz.

……”

Haetlaeng, Daegsam ndiu le, dauqngeix gij saeh haemhlwenz, simgip lumj feiz coemh hangx nei bae cimh Mehvangz, naeuz yaek sikhaek raen dahsau haemhlwenz. Mehvangz nyinhnaeuz Daegsam yaek siengj vaiqdi banh hoengzsaeh, couh ok mbanj bae daiq boux dahsau haenx gvaqdaeuj. Byawz rox, Daegsam caeuq dahsau haenx gangj vahsaed, naeuz haemhlwenz bonjfaenh gwn laeuj lai le, uk miz di luenh lo, gangj maz vah cungj mbouj ndaej geiq lo. Boux dahsau neix mbat dingq Daegsam yienghneix gangj, hozhwnj naeuz Daegsam dwg duz “nengzngahlaeuj”, baenq naj couh deuz. Yenzlaiz boux dahsau neix gaenq deng ndaek “nengzngahlaeuj” ndeu yaeuh gvaq, de ceiq haemz boux ngah laeuj. Daegsam ienq dwk yaek dai, mboengj aek gag mieng, gvaqlaeng mbouj caiq ngah gwn laeuj lo.

Daegsam baez daihsam bae caeuq dahsau raen naj, Laujvangz geij boux de ndoj youq ndaw ndoengfaex henz dah, dajsuenq yungh amqhauh daeuj son Daegsam. Gwnz mbwn, ronghndwen miz fwj goemq yaep raen yaep mbouj. Daegsam siengj, mbwn laep dwk yawj mbouj raen saek yiengh, baenzlawz ndaej yawjraen gij amqhauh ne? Dahsau neix baez raen Daegsam couh naeuz de heuhguh Dahvah. Daegsam mbouj gamj yawj Dahvah, ngaemgyaeuj lumj bak ngoemx nei. Ndaw ndoengfaex cienz daeuj gij sing ae Laujvangz. Laujvangz lingz lai lo.

Dahvah cam:“Dwg maz sing yiengj ne?”

Daegsam naeuz:“Gaej lau, dwg gyoengq goeng ndaw mbanj, gyoengq- de oksing daeuj son gou……”

Dahvah hoemq bak riugege:“Gyoengqde baenzlawz son mwngz ne?”

Daegsam naeuz:“Gyoengqde heuh gou mbei hung di……”

Dahvah cam:“Mwngz guhmaz youh mbouj gamj ngiengxgyaeuj yawj gou, nyinhnaeuz gou dwg duzguk ha?”

Daegsam naeuz:“Gou mbei hung couh yaek guh saeh vaih lo……”

Dahvah cam:“Gou siengj yawj mwngz baenzlawz guh saeh vaih……”

Daegsam couh haeb faenz byaij gvaqbae, laegfwngh cup Dahvah mbat ndeu, cienq ndang doq buet. Dahvah caemh doq mingzbeg lo, sim’angq dwk riugakgak. Mehvangz sikhaek buet gvaqdaeuj, cam Dahvah baenz yiengh lawz, Dahvah haengjhwthwt naeuz:“Gou couh haengj yiengh vunz neix lo!”

Doxaeu banh laeuj haemh de, daihgya gwn laeuj le, Daegsam ngamq yaek haeuj rugmoq youh lau ndaej suk dauq laeng. Laujvangz caeuq Goengmumh、Goengseiqda gyoengqde geij boux doxyaeng, heuh Daegsam gwn laeuj cengq mbei. Daegsam mbat dingq aeu gwn laeuj doq ngauzgyaeuj lo. Laujvangz naeuz:“Haemhneix mwngz yaek gwn cij ndaej.”

Daegsam naeuz:“Gou gwn laeuj couh vaih saeh……”

Laujvangz baez maenj, heuh Mehvangz bae caeuq Dahvah dox- yaeng. Mehvangz baez haeuj dou, Dahvah doq cam:“Daegsam deuz lawz bae ha?”

Mehvangz naeuz:“Miz gienh saeh ndeu yaek caeuq mwngz doxyaeng gonq……Daegsam ndaej 50 cij aeu ndaej yah, seizneix…… de mbeiiq di……”

Dahvah naeuz:“Yaek hawj gou guhmaz, daxsimj, mwngz couh gangj ba!”

Mehvangz naeuz:“Haemhneix Daegsam yaek gwn di laeuj cij……”

Dahvah naeuz:“Gou laihnaeuz sou yaek hawj de cimh lingh yah dem!”

Mehvangz riu naeuz:“Hoeng, Daegsam gwn laeuj le couh miz di luenh……”

Dahvah naeuz:“Gwn laeuj le de yaek dub vunz hat vunz ha?”

Mehvangz naeuz:“Mbouj guh yak baenzneix, couhdwg miz di……”

Dahvah naeuz:“De yaek guhmaz cungj ndaej!”

Mehvangz daj ndaw rugmoq okma le, couh doiq gyoengqvunz naeuz:“Dahvah naeuz le, cijaeu Daegsam gwn laeuj le mbouj dub vunz hat vunz, de caih Daegsam guhmaz cungj ndaej!”

Laujvangz couh bae raix vanj laeuj daeuj hawj Daegsam. Daegsam baez haeb faenz couh ndumqndak caez lo. Laujvangz nyoengx dawz Daegsam daengz bakdou rugmoq:“Sam, mwngz yamq haeuj bakdou neix, saehndei couh baenz lo!”

Daegsam lumj yaek bae hoenx- ciengq ne, bek aek dwk baema rugmoq lo. Laujvangz vadfwngz heuh daihgya doiq ok rog doumonz bae. Gyoengq vunz hix bouxboux mbaet rwz dwk lumj duzdouq ne, yunghsim daeuj dingq ndaw rugmoq miz maz doengdanh.

Baenz byonghngoenz, ndaw rug- moq caemrwgrwg. Goengmumh sim mbouj dingh saekdi, gag mboen naeuz:“Haxbaenh Daegsam vanzlij bek aek dwk, haeuj dou le doq lumj raen duzguk, aiq hwk laemx youq aek congz lo!”

Laujvangz dacaengz Goengmumh naeuz:“Mwngz yaek siengj haeujbae coengh de?”

Goengmumh naeuz:“Gou caen siengj haeujbae coengh de mbat ndeu!”

Mehmumh couh dik mbat din hawj de:“Aen bak rwix mwngz……”

Gyoengqvunz cungj itheij you- sim, haujlai nanz cij dingqnyi Daegsam ae saek song sing. Laujvangz vadfwngz heuh caezgya dingh youq, miz vunz cix saet daengz bakdou rug bae dingq. Daegsam eu:

“Dah yienz raemx mbouj sa,

Bya lij bonghnoengnoeng,

Byawz naeuz laux fouz yungh,

Gaeu geq cungj dok ngaz.”

Dahvah eu:

“Miz sim mbouj you laux,

Doxndiep souh ndaej gyaeu,

Raeuz caez fwen doxngaeu,

Sim gou gyau hawj beix.”

Daegsam eu:

“Song raeuz gap gvanbaz,

Dawz aen gya cauh siengq,

Dajndaem caiq dajciengx,

Lij siengj umj song laeq.

……”

Laujvangz dingqnyi Daegsam baenzneix eu couh nyaenx mbouj ndaej riu lo:“Songde sim daiq gaenj luba, ngamq haeuj rugmoq doq siengj seng lwg la!” De vadfwngz duek daihgya deuz lo. Raen Goengmumh gyoengqde lij yinx dangqmaz cungj mbouj siengj deuz, Laujvangz bek- fwngz naeuz:“Sou yaek guhmaz ha, lij siengj cimh meh ngeih hawj Daegsam dem ha?” Gyoengqvunz cij riuhoho sanq lo……

（sat）