Geij bi neix daeuj, Cungzcoj Si gaenxmaenx haiguh Cuengh Gun song saw vah gyauyuz, haeujcoengh dieg henzguek hwnjguh gij rengz lauxsae song saw vah siujyoz caeuq hwnjguh gij swhyenz song saw vah gyauyuz, coicaenh minzcuz gyauyuz sonhag caetliengh daezsang caeuq swnjcienz vwnzva minzcuz vunznoix aeundaej cingzcik yienhda.

It dwg gyalai hwnjguh vwnzva ndawhag, cauh ok gij heiqfaenh hag song saw vah. Guh daengz byaij haeuj dou hagdangz couh roxnyinh daengz gij heiq Vahcuengh, doenggvaq dieg senhconz ndawhag、diegsuen hagsib、gvangjbo ndawhag daengj senhconz song saw vah sonhag, hawj ndawhag diegdieg yawj ndaej raen Sawcuengh、dingq ndaej nyi Vahcuengh、ndaej yungh Vahcuengh. Lumjbaenz Denh- dwngj Yen Dunghbingz Cin Cungsim Siujyoz ndawhag faenbied laeb miz mbaw biuj singmeh yinhmeh singdiuh Vahcuengh、gaisau Vahcuengh caeuq langhbaij vwnzva Bouxcuengh daengj. Linghvaih, lij laeb miz bozvuzgvanj iq, langhbaij gij minzsuz guhhong gvaq ndwenngoenz ciuhgeq Bouxcuengh, langhbaij le gij neihanz fungfouq caeuq yinxdaeuz daegbied vwnzva minzsuz Cungzcoj.

Ngeih dwg yawjnaek sonhag fuengsik, gyamaenh song saw vah sonhag cwngzgoj. Daengx si 8 aen hagdangz song saw vah sonhag “song loih vunqsik” (hagdangz sawqdiemj sonhag Cuengh Gun song saw vah) cungj hai miz aen ban sonhag song saw vah, it daengz ngeih nienzgaep moix aen singhgiz hwnj 2 dangz Sawcuengh, saedhengz Cuengh Gun song saw vah song loih vunqsik saedniemh sonhag, ndeindei daezsang le minzcuz gyauyuz sonhag suijbingz. Doenggvaq gaenx- maenx haiguh doxdax maegraiz Sawcuengh gyoepyaem、doxdax gangj gojgaeq Vahcuengh、ciengq Fwen- cuengh、doxdax yienj siujbinj Vah- cuengh daengj hingzsik, daezsang le gij naengzlig caeuq yinxdaeuz hagsib hagseng dingq、gangj、doeg、raiz Sawcuengh Vahcuengh.

Sam dwg guh ndei hong gyauyenz song saw vah, daezsang song saw vah sonhag caetliengh. Cujciz haiguh lauxsae hwnj dangz guhyiengh “song saw vah”、dangz goenghai daengj hozdung, hawj lauxsae song saw vah miz gij naengzlig yungh song saw vah hwnjdangz, hawj song saw vah gyauyuz sonhag caetliengh ndaej daezsang.

(Lungz Yenyingh)