Mboengq cuengqgyaj, gou bae lajmbanj ranz goengda youq.

Baez daengz ranz goengda, gou couh soh bae geij gaiq naz goengda. Gou da raen baenz benqhung baenz benqhung gofaiq, youq ndaw naz gofaiq, miz boux ndangngaeuz sugseg ndeu cingq haenqrengz saj yw, fajnaj lwenq saekluengz de hanh lae mbouj dingz, neix couhdwg goengda.

“Da ha, ndat baenzneix bae, langh naetnaiq couh yietnaiq yaep ndeu ba!”Baez raen gou daengz, goengda angq dangqmaz bae, hoeng mbouj cuengq gaiq hongdawz saj yw haenx.“Mbouj baeg、mbouj baeg, mwngz bae lajraemh naengh caj, gou saj gaiq neix liux couh daeuj lo!” Da muengh gvaqbae, mbwn ha mbwn, gaiq naz hung baenzneix, saj fog ndeu couh deng naetnaiq yaekdai bae! Vanzlij, seizneix ndit ndat lai, gij ywnungzyoz neix heiq noengz coeg ndaeng lai, deng ndum gij heiqyw neix liux couh yaek ngunh bae.“Da ha, mwngz ngoenz neix saj di ndeu, ngoenzcog saj di ba! Mbatndeu saj liux dwgrengz lai lo!”Goengda daengx roengzdaeuj lo, cimyawj doenghnaz, riu naeuz：“Vunz nguh naz saek seiz, naz nguh vunz baenz bi! Guh gijmaz saeh cungj yaek guh bae gonq, geij ngoenz laeng neix yaek doek fwn lo!”Gangj sat, goengda youh gaem gaiq ganjsajyw, youh saj yw moq lo. Gou yawj aenndang mizdi gaeuz haenx, sim couh gingq de dangqmaz bae. Guh saeh aeu seizseiz haenqrengz cengguh, neix gangj ngaih, guh hoj!

Gvaq yaep ndeu le, aiq dwg naetnaiq lo, goengda naengh youq dwngjnaz yietnaiq. Gou raen naengnoh de deng ndithaenq dak baenz ndaem- ndet bae, fajnaj nyaeuqnyat de, deng ndwenngoenz dik miz haujlai riz- nyaeuq lo. Gou yawj doenghgij gofaiq maj ndaej mwnhoengh, ndawsim gag cam swhgeij：“Seizndat miz rumz- haenq lai, langh miz rumzhaenq daeuj, doenghgij gofaiq neix deng mbouj deng ci vaih bae ne?”Goengda yawj le nazgofaiq, menhmenh naeuz：“Dwg bw, raq rumz ndeu mbangj goj vaih doenghgij gofaiq neix, hoeng aenvih mbangj miz rumzhaenq couh vit hong mbouj guh, neix gofaiq ndei ndeu cungj ndaem mbouj baenz lo!”Dingq le gou ndawsim doeksaetyat.

Dwg lo, doengda gangjvah miz dauhleix, vunzraeuz langhnaeuz mbouj gag haenqrengz, couh gaej bae gvaiq mbwn ndaq vunz lo! Gou ngeix daengz hagsib、saedceij vunz raeuz, roen raezrangrang ne, raeuz guhsaeh cungj aeu lumj goengda yienghhaenx miz cungj cingsaenz“dajcae dajndaem”neix. Couhsuenq baihnaj roen miz oen lai nya’nyangq bae, raeuz hix aeu gaem cax faenz oen, hai ranghdieg moq ndeu; couhsuenq baihnaj roen bonzbanz lailai, youh lau gijmaz ne? Ginggvaq haemzhoj guh baenz saeh, haengjdingh sawj vunz lai gamj- doengh, lai insik! Gaej gag daengz donh couh ndek couh vit bae, langh mizdi gungzhoj couh ndek vit, mbouj bae haenqrengz sawqguh, nyaenx couh guh maz cungj mbouj baenz lo! Baez ngeix daengz neix, gou coglaeng doegsaw、gvaq saedceij, caen aeu haenqrengz nyinhcaen guh!

Goengda cae naz, gaenxguh hanh doek roengz namh, ndaej cimz daengz gij feihdauh soundaej doenghyiengh dajndaem. Raeuz ne, hix aeu rox“dajcae”ciuh vunz raeuz.

(Vuz Youh)