Vih swnjcienz caeuq baujhoh saw vah minzcuz vunznoix, fatyiengz gij vwnzva vahgangj minzcuz vunznoix. Nanzdanh Yen Minzyij Cunghsinh caeuq Aen Cunghsinh Hoizguh Denyingj Vah Minzcuz Vunznoix Gvangjsih Denyingj Cizdonz doxgap, hoizguh denyingj dinj 《Aenranz Gyaeundei》 youz yinzminz fazyen aen yienh neix ciuq gij anqlaeh caensaed gaijbien goepingj haenx, caemhcaiq youq ndwen 7 ngoenz 31 youq ciet Yauznienz Lijhuz Yauzcuz Yangh cuengqingj baez nduj, vunzlai gyaez dangqmaz, cungj naeuz《Aenranz Gyaeundei》 banj Vahyauz ingj ndaej ndei.

Ciuq cam rox, denyingj dinj 《Aenranz Gyaeundei》 yungh vut gungz gunggeng guh beigingj, yungh “swhfaz banggungz” guh cawjdaez, lwnhgangj gij gojgaeq beixnuengx Bwzguyauz vih gaijbienq diuzmingh, byaij ok runghbya, buekguh baenaj, giethab gihcwngz faz- yen gangingj “suhgi daih’it” gaenx- maenx guh hong banggungz gunggeng, youq mwh dangjveij cwngfuj hengzguh gij cwngcwz senj bae diegwnq youq, ranzgungzhoj saedyienh le gij loqsiengj ranz vunz sam daih senj haeuj ranz moq, hawj vunzlai gungzhoj roxnyinh daengz gij raeuj cwngcwz banggungz leih lwgminz dangj caeuq guekgya. Bouh benq neix yaek youq aen yienh neix gak mbanj Bwzguyauz ingj, dajveh ingj mbouj noix gvaq 300 ciengz.

Cuengqingj baez nduj ngoenz haenx, beixnuengx Bwzguyauz daeuj yawjngonz daengz 600 lai vunzbaez, beixnuengx Bwzguyauz gig gyaezmaij cungj senhconz vunqsik neix. Boux daeuj yawj denyingj cungj naeuz, doenggvaq yawj denyingj hawj gyoengq- de rox haujlai, maqmuengh dangj caeuq cwngfuj lai haiguh cungj senhconz hozdung neix, hawj bannomj minzcuz vunznoix mbouj lumz vahcoj, swnjcienz fatyiengz vahcoj. (Cinz Yihanz Veiz Licinh/岑玉韩 韦丽珍)