Ndwen 7 ngoenz 31, ciet Yauznienz Nanzdanh Yen Lijhuz Yauzcuz Yangh bi gvaq baez haenx youq dieg anceiq Lijhuz Vangzsang “cien ranz Mbanjyauz·fanh ranz Mbanjyauz” aen yienh neix banh. Ndawde, youq diegnywj langhbaij gij ndangdaenj cien dauq buhvaq Bwzguyauz ceiq hawj vunz maij, hawj gyoengq bouxhek gvaqyinx raixcaix, doenghgij buhvaq neix gaenq ndaej liedhaeuj guekgya gaep feihvuzciz vwnzva yizcanj mingzloeg. Bwzguyauz sibgvenq gvaq ciet Yauznienz, Bwzguyauz ndaej Lenzhozgoz Gohgyauvwnzvei Cujciz nyinhdingh baenz aen minzcuz gij vwnzva baujlouz ceiq caezcingj. Ciet Yauznienz dwg ngoenzciet Bwzguyauz ceiq miz minzcuz daegsaek ndawde aen ndeu. Binaengz seizcin dajndaem le、seizcou sou haeux gaxgonq senj ngoenz ndeu guh ngoenz ciet Yauznienz. Hozdung ngoenz haenx beixnuengx Bwzguyauz gak mbanj cungj daenj buhvaq Yauzcuz moqsag gyaeuget, youq dieg dingh ndei haenx ciengqgo diuqfoux, gaj gaeq gaj mou, langhbaij gij minzcuz vwnzva lai cungj lai yiengh, muzdiz dwg gyo’mbaiq cojcoeng、gouzmbaenj fungsou、bauj bingzan.

(Fuz Lungzgyangz/符龙强)